Shillong, Nailar 21 : U MLA jongka Mawlai Constituency u bah Process T Sawkmie u la ong ba ka Organic Mission ba la pyntreikam da sorkar MUA II hapoh ka jingïalam u Dr Mukul Sangma naduh u 2014 ka la pheil namar ki nongrep ki la nang duh nong duh nong namar la pyntreikam ïa kane ka mission khlem da bishar duriap bniah aiu kan ktah ïa ki nongrep.
Haba ïakren bad u nongthoh khubor u bah Sawkmie u la ong “ Naduh ba la pyntreikam ïa kane ka Organic Mission ka la wanrah ka jingduh nong kaba khraw ïa ki paid nongrep kata naduh u snem 2014 haduh mynta u snem. Dei hadien ba kane ka sorkar MDA hapoh ka jingïalam jong u Conrad K Sangma ka la bishar bniah bad lap ba kane ka mission ka la wanrah ka jingduh nong kaba khraw ha kaba ka jingpynmih ka la hiar na ka 100 sha ka 60% ei ei ba kane ka sorkar ka sa rai ban shah pyndonkam sboh dawai biang ha ki katto katne ki jaka rep. Tangba kane kam mut ban ym pynshlur shuh ïa ka jingrep da ki sboh tynrai ne organic hynrei yn pynshlur hi lait noh tang haki katto kane ki jaka khamtam ha kito ki jaka ba ju rep ïa u kubi, u phul kubi, phan, sohsaw bad ter ter”.
U la ong shuh shuh ba une u Myntri Rangbah ba rim (Dr Mukul Sangma) u la dei ban ïaroh ïa kane ka sorkar MDA namar ka la ïai pyrshang mynta la phra snem ei ei ban bud beit ïa kane ka organic mission hynrei hadien ba ka lap ba kam wanrah ka jingïoh nong ïa ki nongrep ba ka rai ban shah biang ban pyndonkam ïa ki sboh dawai khnang ba ka jingpynmih ki nongrep na ka rep ka riang kan kiew biang bad kan lah ban pynim ja ïa ki nongrep ha ka jylla.
