Mynta ka sngi yn sdang shong kyllaiñ myngngor sa ki Seng Bhalang na Garo halor ka MOU

Shillong, Nailar, 21: Ka kynhun ki sengbhalang na rilum Garo kiba kynthup ïa ka GSU, FKJGP, ADE bad ka AYWO ki la rai ban pynlong da ka jingïakhih ba jaijai ha nongbah Shillong kum ka jingbteng ban pyrshah ïa ka jingïasoi ïa ka Memorandum of Understanding hapdeng ka Sorkar Meghalaya bad ka Sorkar Assam.
Ïa kane ka jingïakhih yn sa pynlong lashai ka Lah Sngi u Blei hakhmat u durmot jong u Kiang Nangbah hajan ka Shillong Civil Hospital naduh ka por 11 baje mynstep.
“Ngi ïai ban ba ka jingïasoi ïa ka MoU bad ka jingai ei ïa ki jaka jong ka Jylla Meghalaya sha ka Jylla Assam khlem ka jingmynjur jong ki paidbah ha ki shnong kiba la shah ktah ka long ka bym lah satia ban pdiang daleilei ruh em. Ngi kyrmen ba ka Sorkar kan bishar biang ïa kane ka bynta bad ban pynbeit noh mardor ïa ki jingbakla,” ong u kyrwoh ba la phah da kine ki saw tylli ki kynhun seng.
Kane ka kynhun ka la kyrpad ïa ki paidbah jong ka jylla kiba don ka jingsngewkhia halor kane ka kam ba kin ïashim bynta lang khnang ba ka jingïakhih kan long kaba seisoh.
“Ki paidbah ka jylla Meghalaya kim kwah satia ban duhnoh ïa ka jinglong kynrad halor ka khyndew ka shyiap kaba ki la ïoh pateng na ki longshwa. Kane kan long ka khubor kaba shai ïa ka Sorkar kaba mynta,” la ong kine ki sengbhalang.
Kum ban shu pyntip, u Myntri Rangbah ka Jylla u Conrad K. Sangma ha ka sngi U Blei u la ïakynduh ïa u Myntri Rangbah ka Jylla Assam u Dr. Himanta Biswa Sarma na ka bynta ban ïakren ha kaba ïadei bad ka jingïapynbeit ïa u pud u sam ha ka wat kaba ar na ka bynta ki hynriew tylli ki jaka ba ïakajia pud kiba dang sahteng haduh mynta.
Kine ki sengbhalang, ki la khot bad wer ruh ïa ki sengbhalang na rilum Khasi bad Jaiñtia ban ïasnohkti lang ha kane ka jingïakhih khnang ban phah ïa u kyrwoh uba shai sha ka Sorkar MDA.