Shillong, Nailar 09 : Haduh hynñiew ngut ki samla ka Jylla ki la mih na ka nongbah hynne ka sngi ban leit aireng ha ka lympungbah jong ka Youth IFMA World Cham-pionship of Mauythai kaban long naduh ka 09tarik mynta u bnai haduh ka 21tarik ha Kuala Lumpur, Malaysia.
Ka kyrwoh na ka Muaythai Associaton of Meghalaya, ka ong ba nalor ki arngut ki nongpeit ïa ka kynhun, ki san ki nongïalehkai ki kynthup kiban leit aireng sha katei ka lympung ki kynthup ïa u Ebrest Lyngdoh ha ka thup kiba 48 kilo bad ha ka rta ba 14-15 snem, nangta u Bansahkyrpang Warkhyllew ha ka thup kiba 45 kilo bad ha ka rta ba 14-15 snem.
Ha ka liang ki kynthei pat ha ka thup kiba 14 haduh 15 snem ki kynthup ïa ka Naphilawanbet Nongsiej ha ka thup kiba 45 kilo, Merry Christian Wriang ha ka thup kiba 38 kilo, bad ruh ka Alphonsa Zinia Wriang ha ka thup ba 36 kilo bad ha ka rta ba 12-13 snem.
Ki nongpeit jong ka kynhun ki kynthup ïa u Bah Angeles Sunn kum u referee bad u Judge bad ruh u Bah EG Kharbani kum u Team Manager, India.
Na ka liang ka Muay Thai Association of Meghalaya ka ai ka jingkitbok ïa ka kynhun kaba mihkhmat ïa ka India ba kan lah ban khur takma khnang ba kan long ka burom bad ka jingsarong ïa ka Ri bad ka Jaidbynriew.
Ha kajuh ka por ki la ai ruh ka jingsngewnguh ïa u Myntri Rangbah ka jylla Conrad K Sangma, nangta u MLA ka Umsning bad ruh u Dr. Vijay Kumar IAS kiba la kyrshan borbah ïa ka kynhun ha kane ka kynti ba mynta.
