Jowai, Nailar 09 : Ka kynhun ïalehkai jong ka Mookyndur mynta ka sngi kala ïoh ban rung sha ka jingïakhun phainal jong ka lympung ‘5th Debo Shullai Memorial Trophy’ 2nd Division Football League Cum Knockout Tournament-2022 bala pynïaid da ka West Jaiñtia District Sports Association (WJDSA) .
Kane ka jingïoh rung Phainal sa ka Mookyndur kala wan hadien ba kala lah ban pynliem syndon da 3-1 kol ïa ka West Madan Mustem ha ka jingïakhun kaba la long mynta ka sngi ha madan Kiang Nangbah Stadium Jowai, ïa kitei ki lai kol na ka Mookyndur la thep ar kol da u Jomsing Pariat ha ka minit ba 18 & 78 min bad u Promi Suting ha ka minit ba 46. Katba ïa ka shikol na ka West Madan Mustem la thep da u Ninecyfull Shylla ha ka minit ba 74.
Lyngba kane ka jingïoh rung Phainal jong ka Mookyndur bad ka Khliehïongriang kila rung syndon sha ka kyrdan 1st Division. Katba ka Lumpyrtuh Mihmyntdu bad ka Mynsngad kila hiar sha ka 3rd Division. Ïa ka tarik jong ka jingïakhun phainal 2nd Division yn sa pynbna hadien.
