Nongpoh, Nailar 07: Tang hadien shisngi ba u maw bad ka khyndew ka la twa ha ka surokbah National Highway-6 ha Ri Bhoi ba hap ha ka Shnong Shangbangla bad ha ka miet jong ka sngi Saitjaiñ ruh ka la don biang sa ka jingtwa khyndew ha Umdihar ba hap ha ka bynta jong ka surok National Highway-6 ha Ri Bhoi.
Kane ka jingbteng ka jingtwa khyndew ka dei namar ba ha kine ki taiew ka la don ka jingther u lap bah ba la pynsynjor ïa ka khyndew bad kane ka jingtwa khyndew lada dang bteng ka jingjur slap kan dang lah ban jia ha kane ka surokbah kaba dei ka surok kaba dang kham thymmai hadien ka jingpynheh ïa ka surok ba la tip kum kata ka surok 4-lane.
Ha kine ki jingtwa khyndew bad twa maw ha kitei ki ar jaka, kam shym la don kano kano ka jingjia ba sngewsih bad donbok ruh ba kane ka jingtwa khyndew bad twa maw ka dei kaba jia ha ka por mynmiet ba dan duna ki paidbah ba leit ba wan.
Katkum ka khubor ba la ioh lum, kane ka jingtwa khyndew ha Umdihar ruh ka la pynthud ïa ka leit ka wan ki Kali paidbah bad da ka jingshim khia ki bor pulit na ka tnad Traffic ban kren sha ka NHAI la lah ban pynkhuid noh ïa katei ka khyndew mynta ka sngi bad ki Kali paidbah ki la ioh ban ïaid biang na katei ka surok khlem da pyndonkam shuh tang na kawei ka surok jong ka surok 4-lane.
