Sha Turkey yn leit ïakhun u Hubert Paliar u samla bym ïoh sngew bym lait kren

Nongstoiñ, Nailar, 07: Ka kur Paliar ryngkat ka jingïasnohktilang bad ka shnong Mawrok Mawliehbah bad ka san kyntoid sport club, ka la pynlong ïa ka jingpynkup burom ïa u samla rangbah u Hubert Paliar (u samla bym lait kren ne ïoh sngew), u ba la wanrah ïa ka nam bad ka burom na ka bynta ka shnong ka thaw bad na ka bynta ka Ri bad ka jaidbynriew Khasi hi baroh kawei, da kaba ïoh ban khur ruh ïa ka nam lahduh ha ka jingïakhun kti, kaba dei kawei na ki jingïalehkai kaba la tip kum ka Arms Wrestling ïa kaba la pynlong dang shen ha ka Ri.
Ïa katei ka jingïalang la pynlong ha ka ïing kmie kpa jong utei u samla, u lahduh ka Ri India u ba la ïakhun ha ka kyrdan kaba hapoh ka 55 kg Senior category, u ba la shah jied ruh mynta kum uwei na ki rang kynsai tam napoh ka Ri India, ban leit mihkhmat na ka bynta ka Ri sha ri Turkey, ha kaba utei u samla u hap ban mih nangne ha u bnai Risaw mynta u snem.
Ha katei ka sngi pynkup burom la ïadon lang ki kur Paliar, ki kmie kha na ka kur Kharbani, ki ba haïing hasem, ka kurim u bah Hubert, na ka San kyntoid Sport Club, na ka kynhun kiba duna dkhot met, ki sengbhalang bapher bapher kynthup ïa ka KSU, HANM, WKSU, WYF, MYF, NPYF bad kiwei kiwei.
“Ki samla kiba biang ha ki dkhot met ki la shah teh shah khum ha u drok, hynrei phi long u nonglamktien sha ka pyrthei ba ha khlaw bah ka Ri India don ki rang kynsai” ong u nongïalam ka KSU. “Ym ïohi shuh ïa ngi namar ngi rit palat hynrei U Blei U sei na u rit paid hapdeng ki heh paid ki bym ithuh shuh namar ki lah buh than”, ong ka NPYF
U nongïalam ka WKSU haba ai jingkren u la ong, “Ngi nang mut ba ïa ka nam lahduh ha India kin dei beit kiba na rithor kum na Punjab ne kino kino ki jylla. Phewse na ka ri kaba rit kaba kum kane ruh don pleng ki rang kynsai bad kane ka la pynkyndit bad pynsngew sarong shisha”.
“Ngi dei ban pynduna ïa ka jingsngew synei, hynrei ngi hap ban pynbun ïa ka jingleh isynei namar lada shu sngew synei khlem da leh isynei kam myntoi. Namar une u para jong ngi u donkam ïa ka jingïarap ban dap ka bai lut bai sep ha ka leit ka wan, kaba u hap ban leit shaduh sha ri nongwei”, ong u bah B.Marngar na ka seng kiba duna dkhot met
“U khun kha u jong ngi u bym ïoh sngew bad bym nang kren u la wanrah ka burom ïa ka jaidbynriew. Nga sngew ka dung ka mynsiem da u nar saw”, ong u bah Arphul haba kren na ka liang kmie kha bad bynrap ruh da ki kyntien kitbok kit rwiang bad ai khublei kyrpang