Mih sa u Addl. SDSEO ba la shongthait ban ïakhun na Rambrai Constituency

Nongstoiñ, Nailar, 07: “Wat ym die tad ïa ka vote ba kordor jong phi ha ka dor 500 bad 1000 ha ka por Election”, ong u Bah R.G Momin u ophisar u ba la pynbna ïalade ban ïakhun ïa ka election na Rambrai Jyrngam Constituency kum u kyrtong shimet.
Ïa kine ki kyntien u Bah Momin u la kren ha ka jingïalang bah kaba la long ha madan jong ka St. John Higher Secondary School Nongkroh Rambrai, ha kaba ki paidbah nongkyrshan jong u ki la tuid ban ïoh sngew ïa ka jingshim rai bad jingpynbna jong u ban ïaleh ïa ka election MLA ha u 2023.
Haba kren ha katei ka jingïalang, u Bah Momin u la ong ruh ba ka jingrai jong u ban ïaleh ïa ka election, ka dei eh namar ka jingkwah jong ki paidbah nongkyrshan, kiba na ka por sha ka por ki ju wan ban kyntur ïa u ban ïakhun beit wat lada u hap ban ïaleh kum u kyrtong shimet ruh. U la ong ruh ba u don ka jingangnud ban wanrah ïa ka jingkylla ha Rambrai Constituency, kata kynthup naduh ki paid Khasi bad Garo.
Kum ban pynkynmaw ba u bah R.G.Momin u dei u ba trei ha ka tnad ka pule puthi kum u Additional SDSEO ha West Khasi Hills, ha kaba nyngkong u la sdang ban ïaid sha kylleng ki jaka ban pynshai ha ki paitbah, ba u don jingthmu ban ïaleh elekshon na ka party NPP.
Hynrei, hadien pat ki nongïalam ka NPP ki la pynsngewthuh ba kin nym ai ïa ka tiket sha u, pynban um shym la kynran dien bah hadien ka jingïakynduh lang jong ki nongbud jong u ryngkat ki nongkyrshan, ki la rai ba u bah Momin u dei ban ïaleh beit ïa ka election kum u kyrtong shimet.
Ka jingshim rai jong u bah Momin ban ïakhun kum u kyrtong shimet ka la pynheh mynsiem ïa baroh ki nongkyrshan khamtam eh ki paralok Garo kiba shong ha ki shnong khappud. La sakhi ruh ha ka sngi saitjaiñ ba ki hajar ngut ki nongkyrshan jong u Khasi bad Garo kiba la tuid sha ka jingïalang ban ai jingkyrshan ïa u.
Ha katei ka jingïalang la pynïaid da u bah Pynshlurlang Lyngdoh President jong ka Independent Party Rambrai Jyrngam Constituency. Watla katei ka Independent Party kam pat jied satia ïa ka shap na ka bynta ka election hynrei ka jingpynkhlaiñ ïa ka jingtreikam ka la ïaid shait shait. Nalor kata la dep jied ruh ïa ki nongkitkam kiba dei jong ki samla ba kin nang trei sitom ha kaban pynkhlaiñ haman la ki jaka.
Kumba long haduh mynta, na ki lai tylli ki Constituency ha West Khasi Hills, ka Rambrai Jyrngam ka dei ka Constituency kaba la don haduh san ngut ki kyrtong, kata u bah K.P.Pangniang na ka Hill State People Democratic Party, u bah Spastarlin Nongrem na ka Bharatya Janata Party, u bah Goldenstar Nonglong na ka Indian National Congress, u bah Kimfa S.Marbaniang na ka National People Party bad u Bah R.G Momin kum u kyrtong shimet.