Pynkhamti ka AIFF ïa ka Nongkseh ban pynlong ïa ka Play-off Round jong ka I-League 3 2026-27 ha Shillong

SHILLONG, Naiwieng 11: Ka All India Football Federation (AIFF) ha ka sngi Balang ka la pynthikna ïa ka nongbah Shillong kum ka jaka ban pynlong ïa ka Play-off Round jong ka I-League 3 2026–27.
ïa kane ka wat ïakhun la thmu ban pynlong naduh ka 06 haduh ka 14 tarik u Nohprah 2026, ha SSA Stadium bad MFA Ground, Shillong, ha kaba ka Nongkseh Sport & Social Cultural Club kan long ka klob trai jaka.
Ka Play-off Round kan don 6 tylli ki klob ki ban ïakhun ha rukom ïalehkai kaba tang shi sien kawei ïa kawei pat (single round-robin format) ha ki san tylli ki sngi ïalehkai, ha kaba baroh kin don 15 tylli ki jingïalehkai kiba la buh por ha kane ka lympung kaba khyndai sngi.
Ki kynhun ba ïashim bynta ki kynthup ïa ka NEROCA FC (Manipur), ka BBFS Garhwal Heroes Football Club (Uttarakhand), ka Nongkseh Sport & Social Cultural Club (Meghalaya), ka Clube De Salgaocar (Goa), ka Godavari FC (Andra Pradesh) bad ka Kickstart FC (Karnataka).
Ka Nongkseh SS&CC ka la ïohrung sha ka Play-off Round kum ka lahduh jong ka Group C, katba ka Godavari FC ka la ïohrung kum kawei na ki kynhun kyrdan ba ar (best runners-up) ba kham tbit.
Katkum ka prokram ba la pyllait da ka AIFF Competition Department, ka sngi sdang ka dei ha ka 06 tarik u Nohprah, ha kaba ka NEROCA FC kan aireng pyrshah ïa ka Godavari FC ha ka por 9 baje mynstep, bud sa ka jingïakhun hapdeng ka BBFS Garhwal Heroes FC pyrshah ïa ka Kickstart FC Karnataka ha ka por 2 baje nohphai sngi. Ka Nongkseh SS&CC, kaba dei ka klob trai jaka kan sdang ïa ka jingïakhun pyrshah ïa ka Clube De Salgaocar ha ka por 7 baje janmiet.
Ka Nongkseh kan ïakhun ïa ka jingïalehkai kaba ar ha ka 08 tarik u Nohprah pyrshah ïa ka BBFS Garhwal Heroes FC ha ka por 7 baje janmiet, bud sa ka jingïakhun kaba lai pyrshah ïa ka Kickstart FC Karnataka ha ka 10 tarik Nohprah, kane ruh ha ka por 7 baje janmiet.
Ka jingïakhun kaba saw yn sakhi ïa ka Nongkseh ka ban aireng pyrshah ïa ka NEROCA FC ha ka 12 tarik Nohprah ha ka por 7 baje janmiet, shuwa ba kin pynkut ïa ka jingïakhun Play-off Round pyrshah ïa ka klob kaba na kajuh ka Group, ka Godavari FC ha ka 14 tarik Nohprah. Ka por sdang jong ka sngi ïalehkai ba khatduh ym pat shem la pynthikna da ka AIFF.
Ka por sdang ïalehkai ba man ka por na ka bynta ki saw sngi ba nyngkong la buh ha ka por 9 baje mynstep, 2 baje nohphai sngi bad 7 baje janmiet.
Da kaba don hynriew tylli ki klob na ki bynta bapher bapher jong ka ri kiba ïaknieh rung sha ka wat ïakhun kaba bud jong ka lympung, la khmih lynti ba ka Play-off Round kan wanrah ïa ka jingïalehkai phutbol kaba itynnad bad kaba shongshit ha nongbah Shillong.
Na ka liang jong ka Nongkseh SS&CC ka khot ka wer ïa ki paidbah nongkyrshan phutbol jong ka jylla Meghalaya ba kin wan shakhmat ban ai ka jingkyrshan jong ki, katba ka nongbah Shillong ka dang pynkhreh ban pdiang ïa ki klob na kylleng ka ri na ka bynta kawei pat ka lynnong kaba kongsan ha ka jingïalehkai phutbol jong ka ri India.