Lyngba ka CM-Connect : ïohlad ki paidbah ka thaiñ Amjong ban pynsngew ïa ki jingeh hakhmat u Myntri Rangbah

Nongpoh, Naiwieng 06: Ka shnong Amjong haka thaiñ Mawhati konstitwensi kawei naki shnong khappud kaba dang sahdien ha kiba bun ki liang bashong ba sah da ki jaitbynriew Lalung (Tiwa), mynta ka sngi kila pynpaw ka jingsngewkmen kaba khraw bad pdiang sngewbha ïa u Myntri Rangbah ka jylla u Conrad Sangma haka sien kaba nyngkong eh sha katei ka thaiñ ban ïakynduh markhmat khamtam ban ioh pynpaw bad ïakren ïaki jingeh ba ki paidbah ki mad bad kynduh ha katei ka thaiñ khappud bad ka Assam.
Ha kane ka CM-Connect naka liang ki paidbah kila ioh ban pynsngew markhmat ha u Myntri Rangbah halor ki jingeh ba ki ïakynduh ha katei ka thaiñ naduh ka bording, ka umbam umdih, ka pule puthi, ka jingbym don ki bank bad kiwei kiwei ki jingeh ba ki paidbah ki ïakynduh.
Haba ïadei bad ki jingeh kiba ki paidbah katei ka thaiñ kila pynpaw, naka liang u Conrad Sangma u la jubab markhmat ban weng ïaki jingeh jong ki paidbah katei ka thaiñ, khamtam ba ki kam pynroi kim dei ban sahkut tang haki jaka sor ha kaba u la bthah ïaki sahep sorkar ba ki dei ruh ban poi shaduh ki kyndong kynshrot jong ka jylla khamtam ki shnong khappud.