Ka jaka ïeng kaba la don palat 50 snem kumno la phah ban shong kiba die madan kiba dang tang 6 bnai: EKHBB

Shillong, Naiwieng 06: Ka East Khasi Hills Bazar Bus Association (EKHBBA) ka pynpaw ïa ka jinglyngngoh kaba khraw ba ka Sorkar ka la aipor ïa ki shi taïew ba kin shim ka rai ban mih noh na ka jaka parking kaba ki la kam ba ki la pynïeng ïa ki bus jong ki ha Ïew Mawlong MUDA Parking lot mynta lah palat 50 snem ba kin hap leit pynïeng noh ïa ki bus jong ki sha ka stand pyrshah ka Anjali Cinema bad ban pynshong noh ïa baroh kiba die madan ha katei ka jaka.
Haba kren sha ki lad pathai khubor u Secretary ka Association u Bah Kyrshan Rynjah u la ïathuh ba ka Sorkar kaba la pynpaw ba ka la dep shong ïa ka jingïalang jong ka Town Vending Committee naduh u bnai Jymmang mynta u snem bad kaba la pynskhem ruh ïa ka rai ban wengnoh ïa ki bus na katei ka Parking lot, hynrei ka dang phah pat ïa ka shithi sha ka Association ha ka Sngi Palei ka 05.11.26.
U la ong ba kumno kan lah ban long ban ithuh noh kiba die madan kiba la shong die tang hadien 6 bnai katba ïa kiba ñiah bus bad ka Association ba la palat 50 snem pat ka Sorkar ka thmu ban wengnoh na katei ka jaka ïeng kali kaba la rim bad myndai bha.
Kumta na ka liang ka Association ka la kyrpad ïa ka Sorkar ba kan da pyrkhat bha ïa kane ha shwa ban shim ïa kano kano ka rai namar kan ktah ym tang ïa ki nongñiah, ki trai bus, hynrei khamtam eh ïa ki nongrep bad kito kiba duk ba tlot ka ïoh ka kot kiba donkam ka jingshakri kine ki bus.
Ki la ong ba kane ka jaka ïeng ki bus ha jaka pynïeng kali jong ka MUDA kaba ha Ïew Mawlong, nalor ba ka la long kaba la slem bad kaba la khapngiah lypa, mynta yn pynrung ïa baroh kiba die madan kan long kaba eh bha.
“Baroh ki nongrep, ki nongïew, ki nongshong shnong na ki thaiñ nongkyndong kiba ju wan thied wan pet napoh ka Ïewduh ki ïoh ki jingshakri na kine ki bus jong ngi, nangta ki nongrep ruh kumjuh bad lada shu ong kiba bun ngut ki nongshong shnong jong jan baroh ki district ki ïoh ki jingshakri na ki Bus te kumno ka sorkar ka mut ban pynjynjar pynban ïa kiba rit baria,” buh jingkylli ki dkhot ka seng.
Kumta na ka liang ki nongïalam ka seng ki la kyntu ïa ka sorkar ba kan da pyrkhat bha ïa kane ka rai ba ka la shim ha shwa ba kan ïaid shakhmat ïa ka jingthmu jong ka bad ba kan ym ktah ne wanrah jingeh ïa ki nongshong shnong kiba ïoh ki jingshakri na ki bus kiba ju ïeng hapoh kane ka Parking Lot.