Ha ka phuh ka phieng ki riam tynrai, la pynlong ïa ka Cultural Fest ha Don Bosco College Byndihati

Khliehriat, Risaw 25: Ka Don Bosco College Byndihati East Jaiñtia Hills District, hapoh ka jingialam u Principal jong ka college, u Fr. Daniel.D.M.Cajee, hynnin ka sngi thohdieng ka la pynlong ïa ka Cultural Fest 2026 bad ha ka rukom kaba iphuh, iphieng ki samla pule ki la pyni ïa la ka lariti, ka jinglong tynrai ha ka riam ka beit, ka rwai ka siaw, ka shad ka mastieh, ka trei ka ktah, ha kane ka prokram la wan ban iashimbynta da ki samla pule kiba na ki college bapher bapher kiba na ri lum Jaiñtia na East Jaiñtia Hills bad West Jaiñtia Hills District.
Ha ka bynta kaba nyngkong jong kane ka cultural prokram, la sakhi lang da ka kong Thiangmon Nongtdu kum ka kongsan bad ka MLA Sutnga Saipung ka kong Santa Mary Shylla kum kakongsan ha ka bynta kaba ar ha ka por nohphai sngi, shuh shuh la ïa don ryngkat lang ruh ki kaitor kiba paw na ri lum Jaiñtia ba kynthup u bah Kupar Shadap bad u bah Eladmitre Dkhar, kiba dei ki nongrwai kiba paw, kumjuh ruh ka kong Jopjymon .S.Manar ba na Khliehriat, ka kong Batskhem Talang kaba dei kawei na ki content creator bad u bah Dabul Shylla.
Ka kong Santa Mary Shylla, haba kren kum ka kongsan, ka la ai ka jingkhublei ïa baroh ki samla pule kiba la wan iashimbynta ha kane ka Cultural Fest ha Don Bosco College Byndihati, ka kitbok kitrwiang bad khmihlynti ba ha kawei ka sngi kin poi sha ki kyrdan kiba shalor, ka kyntu ruh ïa ki samla pule ba kin long kiba treishitom watla ki dei ban ïaid bun ki jingeh ha ka jingim bad ong ba na ka liang ka sorkar ruh ka la leh bun kiei kiei ban kyntiew ïa ki samla bad ruh ka sorkar ka la ai ruh ka college hapoh ka district ha kaba ka jingpyntrei ka dang iaid mynta ha shnong Jalaphet bad kyrmen ba kane ka college kan long ka jingmyntoi ïa ki samla pule.
Shuh shuh ruh na ka liang u bah Kupar Shadap bad u bah Eladmitre Dkhar, ki la ai ka jingiaroh ïa ka Don Bosco College kaba la pynlong ïa kaba kum kane ka prokram, ki la ai mynsiem bad pynshlur ïa ki samla ba kin mih rynsan ban pynpaw sha ka pyrthei ia ka jinglong tynrai lane ka culture
u bah Kupar Shadap u la ong ba ka long kaba donkam ban nang pynbha shuh shuh ïa kane ka rwai, ka put, ka tem tynrai kaba ngi sngewthuh ba ngi wan na kane ka tynrai bad ka long kaba donkam ban pynneh pynsah,u kyntu ïa ki skul ki college ba ki dei ban pynlong ïa kane ka prokram lada long kba lah namar kane kan iarap ha kaba pynneh pynsah ïa ka riti ka dustur tynrai, u la ong ba ka donkam ba na ka liang ka sorkar ruh ba kan nang kham pynbun shuh shuh ïa ki rynsan ban pynpaw sha ka pyrthei ia ka put, ka tem, ka rwai tynrai.
Na ka liang u bah Eladmitrei Dkhar, u la ong ba kane ka cultural prokram ka long kaba iytnnad bad kaba sngewtynnad bad ong ba kane kam kut tang kum ka prokram, hynrei kane ka Cultural Fest ka pynkynmaw ïa ka mynnor, ka pynkynmaw ïa ki khanatang kiba hyndai bad ngeit skhem ba lyngba kane ka prokram kan nang ai shuh shuh ïa ka khubor ba ngin sngewthuh ba ngi long kiba riewspah ha ka jinglong tynrai laneka culture.
U Prof. Emanuel Shangpliang. u la ong ba kaba kum kane ka prokram ka long kaba donkam haduh katta katta bad ong ba kaba kum kane ka cultural prokram ka long kaba donkam wat ban pynrung sha ki Acadamy “Nga la ju pyrshang ban hikai ia ki khynnah ban tem ksing, ban tem duitara, ban tem bom ban tem ia ki jingtem tynrai bad kane ka prokram ba la pynlong da ka Don Bosco College kan pynkyndit bynriew ia kiwei ba ka don ka tnat lane ka Acadamy ka ban pynneh pynsah ïa ki jinglong tynrai.
Ha kane ka Cultural Fest, ka kynhun ba la tip kum Ka Snap Creative Society, ka la jop ha ka jingiakop rwai tynrai )Folk Song) bad ioh khur ia ka First Prize, ka Kiang Nangbah Govt College ka ioh khur ia ka Second Prize bad ka Thomas Jones Synod College ka wan ha ka kyrdan kaba lai.
Ha ka jingiakop shad tynrai pat lane ka Folk Dance, ka Thomas Jones Synod College ka la ioh ïa ka First Prize, ka Don Bosco College Byndihati ka la ioh ïa ka Second Prize bad ka Ka Snap Creative Society ka la ioh ïa ka Third Prize.