Pynkut ka Mawkhar ïa ka aïom ïalehkai SSA 1st Division 2026 kum ka lahduh

Shillong, Risaw 20: Ka Mawkhar SC ka la pynkut ïa ka aïom ïalehkai First Division 2026 jong ka Shillong Sports Association kum ka lahduh da kaba pynliem ïa ka Nongkrem SC ha ka jingïakhun phainal, kaba la long hynnin ka sngi Nyngkong ha SSA Stadium.
Baroh arliang ki ladep pynthikna ban kiew kyrdan sha ka Shillong Premier League ha u snem ban wan da kaba poi sha ka phainal, bad kane ka jingïakhun ka long satang ban rai mano ban long ka lahduh ha kane ka kyrdan ïakhun.
Haba phai sha ka jingïakhun, baroh ar kim shym la lah satia ban pynmih ïa ki kol, ha kaba ka jingïakhaid ka la jlan shaduh kaba kut jong ka por pynjlan. Kane ka la pynlong ïa ka jingïalehkai ba kan jam sha ka khep ba khatduh, kata da ka jingïashut penalty ban rai ïa ka nongjop, bad dei hangne ba ka Mawkhar ka la ïoh mad ïa ka jingjop da 4-3.
Kum ka lahduh, ka Mawkhar ka la ïohpdiang ïa ka khusnam pisa kaba Rs 2 lak ryngkat ka trophy ba la sam da u Myntri ka tnad Sport jong ka sorkar Meghalaya, bah Wailadmiki Shylla, katba ka Nongkrem ka la khur ïa ka song pisa kaba Rs 1 lak.
Ki la don ruh ki khusnam shimet sha ki rangïalehkai ba kynsai, ha kaba u Eliasstar Nongsiej jong ka Mylliem Lum bad u Badonkupar Marbaniang ka Nongthymmai ki la khur lang ïa ka nam Top Scorer, nangta u nongap-kol ka Mawkhar u Skhemborlang Marshra, u la khur ïa ka khusnam Player of the Final.
Baroh ar, ka Mawkhar bad ka Nongkrem kin phaikhmat ban ïashim bynta ha ka SSA Champions Cup ka ban sdang ha u bnai Naiwieng. Kane ka lympung kan wanrah lang ïa ki kynhun lahduh bad kiba wan ba-ar ha baroh san tylli ki Division phutbol jong ka SSA ban ïa tynjuhbor ha kawei ka lympung.