La pynjlan biang ïa ka elekshon MDC ha rilum Garo sa 6 bnai namar ka SIR bad pynbeit konstitwensi

Shillong, Risaw 07 : Ka jingïalang jong ka Kynhun Myntri kaba long ha ka sngi Balang ka la mynjur ban pynjlan biang sa hynriew bnai ïa ka samoi treikam jong ka Garo Hills Autonomous District Council (GHADC), kaba mut ba ka elekshon ha katei ka thaiñ kan poi haduh u snem ban wan.
Na ka liang u Nongaiktien ka Sorkar ba dei ruh u Myntri ka tnad ka Koit ka Khiah ka sorkar jylla, Bah Wailadmiki Shylla u la ong ba ka daw kaba kim pat lah ban pynlong mynshwa ïa ka elekshong ka dei namar ka jingktah ïa ka suk ka sain ha rilum Garo.
Ha kajuh ka por u la ong pat ba mynta pat ka jingpynslem ka dei namar ka jingïadei bad ka jingpynbeit constituency (delimitation) bad kumjuh haba ïadei bad ka Special Intensive Revision (SIR), kiba dang ïaid shakhmat.
Katkum ka jingong jong u, ka jingpynjlan kaba nyngkong kan kut ha ka 17 tarik Risaw, bad kane ka rai ka long ka jingpynjlan kaba ar bad kaba khatduh katkum ka aiñ. Ka aiñ ka shah ban pynjlan ïa ka samoi treikam jong ka GHADC baroh lang haduh shi snem.
“Ka jingpynbeit thymmai ïa ki constituency bad ka SIR ka dang ïaid. Namar ba ka jingpynjlan kaba nyngkong kan kut ha ka 17 tarik Risaw, ngi hap ban pynjlan biang ïa ka samoi treikam,” u la ong haba kren bad ki lad pathai khubor.
U la ong ba ka sorkar ka kyrmen ban pyndep noh ïa ka jingpynbeit thymmai ïa ki constituency bad SIR shen, bad ban pynlong ïa ka elekshon GHADC hapoh kine ki hynriew bnai.