Dei tang ki khubor ïalam bakla suda, pynshai ka NPP ba thmu leit pynïasoh BJP ki MLA NPP

Shillong, Nailur 24 : U Treasurer ka seng NPP bad u Political Secretary jong u Myntri Rangbah ka Jylla, Bah Daniel Thangkhiew, u la ong ba ka dei ka buit jongno re kiba thmu ban ïalam bakla ïa ki paidbah da kaba pynsaphriang ïa ki khubor ha ki rynsan social media ba ki MLA ka NPP ki don ha Delhi ban ïakynduh ïa ki nongïalam ka BJP.
“Nga lah ïohi ha ki rynsan social media kiba la kam ba 24 ngut ki MLA ka NPP ki don ha Delhi ban ïakynduh ïa ki nongïalam ka BJP na ka bynta ban wanrah ïa ka jingkylla ha ka saiñ pyrthei ha Meghalaya. Kine ki jingpynsaphriang khubor kim dei kiba shisha, hynrei kadei tang ka buit jong ki katto katne kiba pyrshang ban ïalam bakla ïa u paidbah ka jylla Meghalaya,” ong u Bah Daniel Thangkhiew u ba don mynta ha Delhi.
Haba pyntip ïa kane lyngba ka phone, u Bah Daniel u la ong ba ka seng NPP ka ïatylli kawei bad dang ha kine ki sngi u Myntri Rangbah ka Jylla u Conrad K Sangma u la ïakynduh ïa ki MLA jong ka NPP ha Shillong.
“U Myntri Rangbah ka Jylla bad baroh arngut ki Symbud Myntri Rangbah ka Jylla kiba kynthup ïa u Bah Prestone Tynsong bad u Bah Sniawbhalang ki don ha nongbah Delhi. Ka jingleit ka jong ki sha Delhi ka dei ban leit ïakynduh ïa ki heh jong ka Sorkar Pdeng ban buddien ïa ki projek jong ka jylla Meghalaya bad kam dei satai ban ïakren ïa ka kam saiñ pyrthei kumba la pynsaphrïang da ki katto katne ha ki social media” u la ong.
U Bah Daniel ula ong ruh ba ki MLA bad ki MDC ka NPP ki ïatylli kawei bad mynta ki dang pynleit jingmut bad ki dang pynkhreh na ka bynta ka elekshon MP shiteng samoi sha Lok Sabha bad ïa ka elekshon MDC jong ka Garo Hills Autonomous District Council (GHADC) ban pynthikna ba ki kyrtong ka seng kin jop donburom.
Shuh shuh u la ong ruh ba ka jingleit rung ki 8 ngut ki MLA ka UDP sha ka seng BJP kan ym ktah eiei ïa ka sorkar jylla kaba ïalam da ka NPP bad ba kitei ki ar tylli ki seng saiñ pyrthei ki donlang hapoh jong ka sorkar MDA-II kaba la ïalam da u Conrad K Sangma.