Duh noh ka UDP ïa ka kyrdan Seng Riewlum ba hehduh ha Jylla sah satang 4 ngut ki MLA

Shillong, Nailur 23 : Ka United Democratic Party (UDP) ka la duh noh ïa ka kyrdan kum ka seng riewlum ba heh paid duh ha Meghalaya hadien ba 8 na ki 12 ngut ki MLA ki la leit ïasoh sha ka Bharatiya Janata Party (BJP) ha ka sngi Balang.
Ka jingdon MLA ka UDP mynta kala hiar sha ka 4 ngut. Kine ki 4 ngut ki MLA ba sah ki dei u President ka UDP bad Myntri Sorkar Bah Metbah Lyngdoh, u MLA ka West Shillong Bah Paul Lyngdoh, u MLA ka Mawkyrwat Bah Renikton Lyngdoh Tongkhar bad u MLA ka Mookaiaw Bah Nujorki Sungoh.
Ki 8 ngut ki MLA kiba la kynthih seng ki dei u Bah Lahkmen Rymbui (Amlarem), Kyrmen Shylla (Khliehriat), Mathew Beyondstar Kurbah (Mawphlang), Synshar Kupar Roy Lyngdoh Thabah (Sohiong), Balajied Kupar Synrem (Shella), Mayralborn Syiem (Nongpoh), Pius Marwein (Ranikor) bad Bah Olan Sing Suin (Mawsynram).
Kine ki 8 ngut kila dep pynïasoh sha ka BJP ha ka jingïalang ba long hapoh ka Headquarter ka BJP ha New Delhi ha ka jingïadon ryngkat u Myntri ka Sorkar Pdeng Kiren Rijiju, u Nongaiktien ka party Sambit Patra bad u President ka BJP Meghalaya Rikman G Momin.
Kane ka jingïasoh kala wan jia hadien ba ki nongïalam ka BJP ki la kular ban leh ei ei noh halor ki saw tylli ki mat jingdawa ba kongsan jong ka Jylla-ka jingpynrung ïa ka ktien Khasi bad Garo ha ka Khyrnit ba Phra, ka jingpynkynriah ïa ka Them Metor na Them ïew Mawlong, ka jingpynjynsur ïa ka kam tih dewiong bad ka jingpynkylla ïa ka Meghalaya Residents Safety and Security Act (MRSSA) ban tehlakam ïa ka jingrung kyrthep ki briew ba nabar sha Jylla.
Da kane ka jingïasoh, ka BJP mynta ka la kiew ha ka jingdon MLA na ka 2 ngut sha ka 10 ngut hapoh ka ïing Dorbar Thaw Aiñ ba 60 ngut ki dkhot ka Jylla.
Da kane ka jingnang bun paid, ka BJP kala khmih lynti ban ïoh kham heh ka bhah ha ka Sorkar MDA, kaba la pynmih ïa ka jingantad ba kan sa don ka jingbujli shuki Myntri.
Kane kala wanrah ïa u lyoh ba dum haba phai sha ka lawei jong ka UDP hapoh ka Sorkar MDA ba ïalam u Conrad, kaba la pynmih ïa ka jingkylli la ka UDP kan dang ïoh bat ïa artylli ki shuki Myntri.