SHILLONG, Nailar 19: Ka long ka jingsarong ïa ka jylla Meghalaya ha kaba saw ngut ki nongpynïaid jingïalehkai lane ki technical official ki la shah jied ban don bynta ha ka lympung BWF World Championship 2026, ha New Delhi.
Kine ki official ki kynthup ïa u Badon Marwein (Nongstoin), u Sobin M. Sangma (Tura), u Riman Lyngdoh (Shillong) bad ka Eranicle Syiem (Shillong).
Ka jingshah jied jong kine ki saw ngut ban don bynta ha ka ban pynïaid ïa katto katne ki jingïalehkai ha katei ka Championship ka pynpaw ïa ka jingtrei shitom, ka jingaiti lut bad ka jingshemphang jong ki ha kane ka jingïalehkai badminton, bad ka long ruh kaba sngew sarong ïa ka kynhun badminton baroh kawei jong ka jylla Meghalaya.
Lah ban kdew ruh ba kane ka pyni ba ka jylla ka don ïa ki official kiba tbit bad kiba bit ban mihkhmat ha ki rynsan ïakop kiba kham shalor.
Ka jingïohlad jong ki ban shim bynta ha katei ka championship kan ai mynsiem ruh ïa ki samla ïalehkai, ki coach bad ki official ha kylleng ka jylla ban trei shitom bad ban thmu ïa ka thong kaba kham heh ha ka badminton.
