SHILLONG, Nailar 19: Ka Lawsohtun SC bad ka Umlyngka SC ki la jop ïa la ki jong ki jingïakhun da kaba suk ha ka lympung Second Division Football league 2026 jong ka Shillong Sports Association, kiba la long hynne ka sngi Balang (19 tarik Nailar 2026) ha Polo.
Ha SSA Ground, ka Lawsohtun SC ka la pynjemkhnap haduh 5-0 kol ïa ka Sohryngkham SC, ha kaba u Sahame Lyngdoh (31 & 90+4) bad u Lamin Thangkhiew (42 & 47’) ki la pynkhihjar mar ar sien, katba kawei ka kol la thep da u Firstmoon Kharkongor (50’).
Ha MFA Ground, ka Umlyngka SC ka la pynliem noh da 4-0 ïa ka Mawkriah West SC. U Hamlet Thabah (16 & 63’) u la pynkhihjar ar sien, katba u Jollystar Hynniewta (48’) bad u Nichelson Lyngkhoi (75’) ki la noh synñiang mar kawei.
