Durand Cup: Mynta yn rai ka NEUFC bad ka MBSG ïa ka jaka ba dang sah ha ka phainal

Shillong, Nailar 19: Ka NorthEast United FC, kaba ïada ïa ka nam lahduh, kan kyrmen ban rung lai sien lynter sha ka phainal ynda kan ïakhun pyrshah ïa ka Mohun Bagan Super Giant, kaba la jop haduh 17 sien, ha ka semifinal kaba ar jong ka 135th IndianOil Durand Cup. Kane ka jingïalehkai kan long ha Jawaharlal Nehru, Shillong mynta ka sngi Palei, 20 tarik Nailar, 2026 ha ka por 7 baje janmiet.
Ka NEUFC ka la rung sha ka semi phainal kaba saw sien lynter jong ka Durand Cup hadien ba ka la pynliem ïa ka Shillong Lajong FC ha ka jingïakhun Quarter phainal kaba jur bha. Da kaba wanphai na ka shi kol hadien ba ki la shah lamkhmat da 2-1 ha ka kylla step, ka Northeast ka la pynkylla ïa ka jingïalehkai ban jop da 5-2 kol.
Ha kawei pat ka liang, ka Mohun Bagan, ka klob kaba seisoh tam ha ka histori jong kane ka lympung da kaba jop 17 tylli ki nam lahduh, ka la jam shakhmat khlem jingbakla khlem da shah thep wat tang kawei ka kol ha ka group stage, ka la ïakhaid mar 1-1 bad ka Jamshedpur FC ha ka QF, shuwa ba kan khur ïa ka jingjop lyngba ka penalty shootout da 9-8.
Na ka bynta ka NEUFC kane ka jingïakhun ka long kaba kongsan katba ka dang beh ban rah ïa ka khusnam Durand Cup kaba lai sien lynter, kaba ym pat ju jia mynno mynno ruh ban pynskhem ïa ka jingkhlaiñ bor jong ka ha ka phutbol jong ka ri India.
“Ka dei ka semi-final jong ka Durand Cup, ka jingïalehkai kaba kongsan ïa ngi, bad ruh ïa ka Mohun Bagan”, la ong u Benali, coach ka NorthEast United. “Kan ym long kaba suk na ka bynta kano kano ka kynhun. Ngi kren shaphang ka liang pyrshah ha kaba jan baroh ki nongïalehkai napoh ri jong ki ki dei ki nongïalehkai ba man ka por jong ka kynhun ïalehkai ka ri, ryngkat bad ki nongïalehkai nabar ri kiba kynsai bad u coach uba tbit bha.”
Ha kawei ka liang, u coach ba thymmai jong ka MBSG, u Panagiotis Dilmperis, un thrang eh ban ïoh ïa ka khusnam lahduh kaba nyngkong eh jong u bad ka klob shuwa ban sdang ka ISL 2026-27.
Haba phaidien sha ki rekod jong ki jingïalehkai ba ladep hapdeng kine ki arliang mamla, ka jingmih ka kham noh sha ka liang jong ka kynhun na Kolkata: ha ki 13 tylli ki jingïakhun ba la dep, ka Mohun Bagan ka la jop 10 sien, haba ïanujor bad ka NEUFC kaba la jop ar sien bad kawei ka la kut ha ka jingïakhaid.