Jowai, Nailar 19: Ka Momer SC, ka Christian Club Namdong bad ka Thadmusem SC ki la jop ïa la ki jong ki jingïalehkai ha ka lympung phutbol kaba la tip da ka (L) Joybell Suiam Memorial Football League 2026 Second Division bala pynïaid da ka Thadlaskieñ Sport Association, kiba la long hynne ka sngi Balang, 19 tarik u Nailar, 2026 ha madan Wahiajer Multi Sports Complex Stadium.
Haba phai sha ka jingïakhun kaba nyngkong ka Momer SC kala jop da ka said da tang 1-0 ïaka Mukhla Veterans. Kane ka kol na ka Momer SC la thep da u Shain Chyrmang haka minit ba 50.
Kumjuh ruh ha ka jingïakhun kaba ar la sakhi ïa ka Christian Club Namdong kaba la jop da tang 1-0 kol ïaka Modop SC. Ka shi kol jong u Starwell Sungoh haka minit ba 26 jong ka kylla step ka la paw ba ka la biang ïa ka Christian Club Namdong ban khur ïa ka jingjop.
Nangta ha ka jingïakhun kaba lai la sakhi ïa ka Thadmusem SC kaba la wanphai na ka shi kol ban pynliem noh da 2-1 kol ïaka Mukhla Mission.
Ha ka jingïakhun dei ka Mukhla Mission kaba la pynkhihjar nyngkong lyngba u Wompher Phawa haka minit ba 3 hynrei ka Thadmusem SC ka la pynïakhaid noh lyngba u Ebormi Mukhim haka minit ba 17 shuwa ba u Karmi Dkhar un thep ïa ka namtam haka minit ba 59.
La pyntip ka jingïakhun lashai ka sngi 20/08/2026 haka por 10 baje mynstep ka Maskut SC pyrshah ïaka Madur SC. Ha ka por 12 baje mynsngi ka Mainroad SC Wahiajer pyrshah ïaka Niriang Pdienlum. Katba haka por 2 baje janmiet ka Iawthymbleiñ SC pyrshah ïaka Mukhla Sohshrieh.
