Sha ka ïingbishar NGT ujor ka JSU pyrshah ïa ka projek tih mawshun ka Shree Cement

Shillong, Nailar 18 : Ka Jaintia Students’ Union (JSU) ha ka sngi ba-ar ka la mudui sha ka NGT Eastern Zone Bench ha Kolkata pyrshah ïa ka project tih mawshun ka Shree Cement ha ka jaka ba 217.394 hectare ha  East Jaintia Hills, bad ong ba kan sa leit ruh ban tied ïa ka jingkhang ka ïing Bishar High Court ka jylla halor ka jingkynnoh bym leh eiei ka Sorkar Jylla.

Ka kynhun ka JSU ba ïalam da u Education Secretary Bocheru Mi Pohsnem kala aiti ïa ki sakhi satar sha ka Tribunal.

Kane ka sienjam kala wan jia hadien ba kut ka jingaipor ba 10 sngi ïa ka Sorkar Jylla, ïa kaba ka JSU ka ong ba ka Sorkar kala shu sngap jar bad khlem leh eiei halor ki jingujor bad ki ejahar ka seng.

Ka JSU kala kynnoh ïa ka Jylla, ki Pulit bad ki Tnad ba dei khmih ïa ka “jingbym leh ei ei khnang bad ka jingbym lah ban ïada ïa ki nongshong shnong trai muluk”.

Ka la ïasaid ba ki kyndon ïada mariang ki treikam ban khang ïa ka jingtih dewiong ka thaiñ ka dei ruh ban treikam sha ki project jong ki kompani.

“Lada ka NGT ka lah ban khang ïa ka jingtih dewiong ki nongshong shnong- pynduh ïa ka lad kamai jakpoh jong ki briew jong ngi namar ka mariang-kane ka juh ka rule ka dei ban treikam ïa ki project tih par jong ki kompani” ong ka JSU.

Nalor ka jingujor sha ka NGT, ka JSU ka pyntip ruh ba kan sa leit mudui da ka mukotduma sha ïing Bishar High Court ban dawa pyntynrong ïa ka jingbahkhlieh halor ka jingbym trei hok ïa ka kam.

U Pohsnem ula ai ka jingmaham kaba tyngeh ïa ki bor khmih.

“Ngi la wad ïa ka jingbishar ba hok lyngba ki lynti ka aiñ kiba don. Hynrei, lada ka High Court ka kyntait ïa ki jingud jong ngi bad ñiew ïa ki nongshong shnong trai muluk ka ri-lum Jaintia kum ki ñiangkalaw, ngin sa pyni sha ki ïa ka bor ba shisha jong ki ñiangkalaw.Wat ym tynjuh ïa ka jinglah shah jong ngi..Ki samla kila peitkai” ula ong.

Ka JSU kala aiti ruh ïa ka sakhi da ka video sha ka NGT, kaba pyni ïa ka longkmie ba armet kaba shah khang lynti ban leit wad jingsumar hadien ba ka jingtih ïa ka surok ha Daistong, ka jingthombor ïa ka ambulance ka JSU bad ka jingpynbor ïa ka Sorkar ban khanglad ïa ki nongïakhih.

Ka JSU ka ong ba ka ïeng ryngkat bad u paidbah ka ri-lum Jaintia bad dawa ïa ki tnad Sorkar ba kin leh ei ei noh mardor.

“Lada ym lah ban leh eiei, kan pynbor ïa ngi ban shim ïa ka lynti jingïakhih” ula ong.