Mynjur ka GHADC ban ïoh ïakhun bad thep vote tang ki riewlum trai ri Garo

Tura, Nailar 10 : Ka Garo Hills Autonomous District Council (GHADC) mynta ka Lah Sngi U Blei ka la mynjur ïa ka Amendment ne jingpynkylla ïa ka Rules 128 bad 129, kaba plie lad ban don noh ïa la ka jong ka Electoral Roll ne thup kyrteng elekshon jongka elekshon MDC sha GHADC bad ban khanglad ïa ki bar jylla ba kin ïakhun bad ïoh thep vote ha ki elekshon ka Council.
Kane ka sienjam ka dei ka jingpynkylla ha ka rukom long rukom man ha kaba ïadei bad ka Electoral Roll jong ka Sixth Schedule bad kaba la pynurlong ruh ï a ka jingdawa kaba la sahteng jong ki paid Garo bad ka jingkular kaba la khlei da u Myntri Rangbah ka Jylla bad u Nongïalam ka seng National People’s Party (NPP) u Conrad K. Sangma.
Lah bun phew snem, ïa ka elekshon MDC ha GHADC la pynlong da kaba pyndonkam ïa ka Electoral Roll kaba la pynkhreh na ka bynta ka elekshon Assembly. Da kane ka jingpynkylla thymmai, katei ka rukom treikam kan kylla noh da ka thup kyrteng kaba kyrpang kaba la pynkhreh thik na ka bynta ka elekshon MDC jongka GHADC.
Kane ka jingwanrah ïa ka jingkylla ka long kaba kongsan ym tang ba ka wanrah ïa ka thup kyrteng kaba kyrpang ïa ki nongthep vote hynrei namar ba kala pynkylla syndon ïa ka jinglong jong ki nongthep vote jong ka GHADC.
Hapoh jong kine ki juh hi ki kyndon, kiba lah ban thep vote kin dei kiba la pynïasoh bad ka jingïoh ïa ka kyrdan Scheduled Tribe ne Riewlum trai ri kumba la ithuh da ka jylla Meghalaya ryngkat bad kiwei pat ki jingbuh kyndon. Kane kan ym kynthup shuh ïa kito ki bym dei ki riewlum ha ka Electoral Roll jong ka GHADC.
Kane ka jinglong jingmam ka dei kaba la mih hadien ba la mynjur ïa ka jingpynkylla ne Amendment kaba la mynjur ha u bnai Lber mynta u snem kaba la wanrah ïa ka kyrdan Scheduled Tribe kum kiba lah ban ïakhun ïa ka elekshon MDC ka GHADC.
Kane ka jingkylla ka mihkhmat ïa ka jingpynkylla ïa ka rukom pynlong ïa ka elekshon kaba la don lypa naduh ka por ba la thaw ïa ka GHADC ha u snem 1952, ha kaba ki dkhot ne kino kino ki jaidbynriew ki la lah ban ïashimbynta ha ka elekshon jong ka Council.
Ka jingdawa ïa ka thup kyrteng kaba la ka jong ka dei kaba la rah bad pynpaw da ki snem ha Garo Hills, ha kaba ki nongkyrshan ki la pynpaw ba ka jingshna ïa ka thup thoh kyrteng ne Electoral Roll jong ka elekshon jong ka riti treikam hapoh ka Sixth Schedule ka dei ban ïaid katkum ka jingpynkup bor ka riti synshar ka ri ban ïada ïa ka bha ka miat jong ki riewlum bad ban plie lad ïa ki riewlum ban synshar hi dalade.
ïa kane ka Amendment la mynjur ha ka ïing Dorbar hynrei kaba kham sngewphylla ka long ba u MDC ka Tura u Rimpu Marak, um shym la don satia ha ka ïing dorbar ha ka por ba mynjur ïa kane ka Amendment.
Kane ka Amendment mynta ka la plie ïa ka lynti ban pynkhreh ïa ka thup kyrteng kaba kyrpang jong ki nongthep vote ka GHADC, kaba long ruh kum kawei na ki jingpynkylla kiba khraw ha ka rukom pynlong elekshon ha ka Council naduh ba la thaw ïa ka.
Ka long ka jingkdew ïa ka rukom pynkylla ka ban batai shai kdar mano ki ban ïoh jied ïa ki nongmihkhmat sha ka jaka treikam jong ka Sixth Schedule ban ïada ïa ka bha ka miat jong ki riewlum bad ïa ka rukom synshar khaddar.