La shah ban ïaid kali biang na surok Shillong- Dawki hynrei dang khang ban ïaid mynmiet

Shillong Nailar 10 : Ka leit ka wan lyngba ka surok Shillong – Dawki ka la sdang biang naduh mynta ka sngi Nyngkong hadien ba ki bor pynïaid distrik ki la pynbna ïa kane ha kane ka sngi U Blei.
Na ka liang u Additional Deputy Commissioner jong ka Pynursla Civil Sub-Division, ha ka 09tarik mynta u bnai u la pynmih ïa ka jingpynbna ban plie noh ïa ka bynta jong ka surok Shillong-Dawki (NH-206) naduh ka 10 tarik hadien ba katei ka surok kala shah khang dam baroh shi katta.
Katkum ka jingpynbna na ka liang u ADC ka Pynursla Civil Sub-Division Bah G. Warjri u la ïathuh ba ïa kane ka jingpynbna la pynmih hadien ka jingwan jurip lang ha ka 08 tarik u Nailar bad ki heh ophisar jongka NHIDCL bad kumjuh na ka ophis u Executive Engineer PWD (Roads), Pynursla Division, Pynursla.
Shuh shuh la ong ba katkum kane ka jingpynbna, la pyntip sha ki paidbah bad sha baroh ki nongleit nongwan ba ka surok Laitlyngkot-Lyngkyrdem (Chainage Kms 24+00 – 37+00) jong ka Shillong-Dawki Road (NH 206) yn plie noh noh naduh ka 10 tarik u Nailar na ka bynta ban ïaid baroh ki jait kali.
La pynbna ruh ba ka jingkhang ïa ki kali ban ïaid ha ka por mynmiet kan dang ïai bteng naduh ka por 10:00 baje mynmiet haduh 05:00 baje mynstep bad la kyntu ïa baroh ki nongleit nongwan ba kin bud ryntih ïa kane bad ïa ki jingbthah kiba la pynmih da ki bor kiba dei khmih.
Namar ka jingwan ka aiom lyiur bad ka jingslap kaba lah ban mih ki jingtwa khyndew, ka jinghap ki maw bad ka jingbym shngain ki surok, kumta la kyntu jur ïa baroh ki nongleit nongwan bad ïa ki paidbah ba kidei ban long kiba phikir bha haba ki leit jingleit lyngba katei ka surok.
La kyntu ïa ki paidbah ba kin kiar ïa kino kino ki jingleit ki bym donkam ha ka por ba jur bha u slap ne mar ïa dep ther u lapbah bad ha ka por mynmiet.
Ha kajuh ka por la pyntip ruh ba la shah ban ïaid ïa ki kali kum ki Ambulance, Fire Service bad Pulit ha ki por ba khang ïa ka surok bad ki lah ban phone ha Pynursla Police Station ha u Phone Number: 9862251116 khnang ban khmih ïa ka jingshngain da ki bor kiba dei khmih kiba don ha katei ka jaka.
Shuh shuh la kyntu ruh ïa ki paidbah ba kin ai ka jingïatreilang bad ban bud ryntih ïa ki rukom pynïaid kali kiba la pyntreikam na ka bynta ka bha bad ka jingshngain jong ki paidbah.