Halor ka jingjulor ki kali bad julor ka surok PWD ha ka por ba long ïa ka Jingpynsngew Paidbah ka Shree Cement

Khliehriat nailar 03: Ka Jaiñtia National Council Khliehriat Circle mynta ka sngi ka la leit buh da ka jingujor hakhmat u Deputy Commissioner ka East Jaiñtia Hills District halor ka jingshah pynjulor ki kali jong ki briew bad jingpynjulor ïa ka surok PWD ha ka por ba pynlong public hearing ka Shree Cement ha elaka Nongkhlieh, East Jaiñtia Hills District.
Katkum ka shithi ujor ba la soi da u President JNC Khliehriat Circle, u samla Shanborlang Bamon bad u Secretary, u samla Symbohbaiar Sumer, ka seng ka la pynpaw da kaba ong ba ha ka jingshisha ka public hearing ka dei kata ka jingpynsngew paidbah ha kaba baroh ki dei ban iashimbynta bad ka jingleh donbor, ka jingpynjulor ïa ki kali, ka jingpynjulor ïa ka surok PWD ka pynduh mynsiem ïa ki nongshongshnong ban pynpaw ïa ki hok jong ki ha ka public hearing.
“Kum ban shu bynrap, wat ïa ka surok P.W.D ha ki bynta ban leit sha ka jaka ba long public hearing ruh la tih bad pynjulor bad kane ka paw ba ka dei ka jingpynjulor ïa ka surok ki paidbah kaba la shna da ka pisa paidbah, kaba kum kane ka jingleh ym tang ba ka buh jingma ïa ki paidbah hynrei ka dei ka jingpynkheiñ ruh ïa ka aiñ” pynpaw ka JNC-Khliehriat Circle.
Ka seng ka kyntu ïa ka ophis u Deputy Commissioner East Jaiñtia Hills District ba dei ban pynlong da ka jingtohkit kaba khuid ka bym don kano kano ka shah shiliang ïano ïano halor kine kiei kiei kiba la jia ha ka sngi ba pynlong public hearing, ban wad bad leh katkum ka aiñ ïa kiba donkti ha kaba pynjulor ïa ki kali bad ïa ka surok PWD.
Kumjuh ruh ka seng ka ong ba dei ban siew ïa ka bai lutksan sha kito kiba shah pynjulor ïa ki kali bad ruh ban pynneh pynsah ïa ka shongsuk shongsaiñ ban long ka jingshngaiñ ïa ki paidbah.
Haba kren sha ki pathai khubor, u bah Mehi Rymbai, uba dei u Secretary jong ka Art and Culture jong ka Jaiñtia National Council, u la pynpaw ka jingsngew khia halor kaei kaba la jia ha ka 30 tarik u naitung, kata shi sngi shuwa ban long ka public hearing jong ka Shree Cement bad ruh halor kiei kiba la jia ha ka 31 tarik kaba dei ka sngi ba long public hearing bad ong ba na ka liang ki paidbah ki la mad jingeh bad kynnoh ruh ba ka Shree Cement ka la pyndonkam da ki mafia kiba kah dur khmat la kum ki lehnoh, ki la pynpait pynjulor ïa ki kali jong ki paidbah bad ong ruh ba lada ka sorkar kam kem ïa kiba donkti, ka sorkar hi ka la long ka nuksa ban pyniap ïa ki briew ba lui lui, u la ong ruh ba kane ka pynpaw ïa ka jingtlot treikam ka tnat Home Department.
U bah Mehi Rymbai, u la ong ba ka JNC ka ieng ha ka nongrim na ka bynta ka hok jong ki paidbah jong ka elaka Nongkhlieh bad lada kem ïa uwei ne ar ngut ki nongialam ka JNC ka dang don da ki spah ngut ki nongialam.
Shuh shuh, u la ong ba ka jingpynjulor ïa ki kali jong ki briew bad ka jingpynjulor ïa ka surok PWD ka lah ban dei lehse ba phah ka Shree Cement ba la ai bor da ka sorkar ban khanglad ïa ki paidbah kiba mut ban leit sha ka public hearing ha Lum Syrman, u bah Mehi u kyntu jur ïa u Deputy Commissioner ba un shim khia halor kiei kiba la jia ban pynlong da ka jingtohkit kaba khuid ka bym don ka jingshah shiliang ïano ïano ruh.