Maham ba lada ym lah ban pynurlong ka Union ban pynlong da ki jingïakhih ha kylleng ka jylla

Shillong, Nailar 3: Ka Khasi Students’ Union ka la ai por 15 sngi ïa ka sorkar Meghalaya ban pynurlong ïa ki jingdawa kiba la sahteng la slem bha, da kaba maham ba lada ym lah ban leh eiei kan pynbor ïa ka Union ban pynlong ïa ki jingïakhih ha kylleng ka jylla.
Ha ka shithi sha u Myntri Rangbah ka jylla u Conrad K Sangma, ka KSU ka ong, “…(Ngi) pynpaw ïa ka jingsngewsih bad jingbitar ïa ki rukom synshar donbor jong ka sorkar Meghalaya ha ki jingjia ba dang shen ha East Jaiñtia Hills District bad kumjuh ruh halor ki jingthok ba ka sorkar ka leh ban pynslem ïa ki mat jingdawa bapher bapher kiba dang sahteng mynta.Da ki jingïakren la bun sien bad ki jingialang ki bym sei soh, ka union kam don lad shuh hynrei ban ai por ïa ka sorkar Meghalaya 15 sngi ban pynbeit ïa ki mat ba dang sahteng ba la kdew harum bad lada ym lah ban pynurlong, ka union kan hap ban pynlong jingïakhih bad pyrshah haduh ba ki mat ba la dawa kin ïoh ban urlong.”
Ka la pynpaw ïa ka jingsngewsih kaba jur halor ka jingpynïaid ïa ki jingjia ba dang shen ha East Jaiñtia Hills, khamtam eh ïa ka jingbishar paidbah na ka bynta ka Shree Cement kaba la long ha ka 31 tarik Naitung, 2026.
Ka seng ka la kynnoh ba ki bor synshar district, ki pulit bad ka Meghalaya State Pollution Control Board ki la leh na ka bynta jong katei ka kompeni bad ki la khanglad ïa ki briew kiba pyrshah ïa katei ka projek ban rung shapoh katei ka jaka.
Katkum ka KSU, ha ka miet shwa ban sdang ka jingbishar paidbah la iohi ïa ka jingpyndonkam ïa ki bom pynsat khmat, ka jingtih ïa ka surok ha Ladtonseng, bad ki kynhun ki la kawang maw kaba la pynjulor ïa ki kali bad pynmynsaw ïa ki briew.
Ka seng ka la kam ba ki jingkhot na u Deputy Commissioner, u Superintendent of Police bad Police Station ba marjan kim shym la jubab, bad ka la dawa ba dei ban pynduh noh ïa katei ka jingbishar paidbah.
Ka Union kala pan ruh ïa ka jingpynshitom jong ka tnad pyrshah ïa u DC bad SP ka East Jaintia Hill bad ïa ki ophisar ka MSPCB.
Shuh shuh ka union ka la pyrshah jur ruh ïa ka jingkren u Symbud Myntri Rangbah ka Jylla u Bah Prestone Tynsong ha ka 29 tarik Naitung ha kaba ïadei bad ka Meghalaya Residents Safety & Security Act, 2016.
Ka KSU ka la ong ba ka sorkar ka la pynslem ban pyntreikam da ki snem wat hapdeng ka jingshim jaka bad la mang pisa na ka bynta ki facilitation centre ha ki jaka rung bad jaka mih ne ka entry bad exit points.
Ka la dawa ban pyntreikam mardor ïa katei ka Act ryngkat bad ka jingpynshisha ïa ki nongshong wai da ki dorbar shnong, bad ka la bthah ïa ka sorkar ban ai ïa ki kaiphod man ka taiew ïa ka jingiaid shaphrang ban buh ïa ki centre.
Kawei pat ka jingdawa kaba kongsan ka dei bad ka 2024 amendments jong ka Meghalaya Identification, Registration and Safety of Migrant Workers Act.
Ka KSU ka la kdew ba ka kynhun myntri ka la mynjur ïa ki jingpynkylla ha ka 3 tarik u Nailar 2024 ban pynlong ïa ka jingpynshisha bad jingpynrung kyrteng da ki pulit, hynrei ki dang sah ban pyntreikam hadien jan ar snem.
Ka Union ka la ong ba kane ka jingpynslem ka ailad ïa ka jingwan tuid ki bar jylla khlem da tehlakam bad ka buh jingma ïa ka jingshngain jong ki nongshong shnong trai ri.
Halor ka koit ka khiah, ka KSU ka la pynkynmaw ïa ka jingiakhih shong kyllain mungur jong ka ha NEIGRIHMS ha u bnai Jymmang 2025 halor ki mat kiba kynthup ïa ka nos bad ka jingbuh bhah kyrpang ïa ki trai ri trai muluk.
Ïa ka jingïakhi la weng noh hadien ba ka sorkar jylla hapoh ka jingialam u Bah Paul Lyngdoh u la kular ba un sa rah ïa kane ka mat sha ka Ministry of Health and Family Welfare.
Shi snem hadien, ka KSU ka la ong ba kam shym la don kano kano ka jingbuddien na ka jylla bad ka la kyntu ïa ka sorkar ba kan pynbeit kyrkieh ïa katei ka kam.Shuh shuh ka union ka la khot ban pynkylla kyrkieh ïa ka jingpynrung kam.
Ka la dawa ba dei ban pynduh noh ïa ki personal interviews na ka bynta ki kam Grade B non-gazetted, Grade C bad Grade D posts bad dei ban pynduh noh ha ryngkat bad ka central DoPT guidelines ban pyntikna ïa ka jingkhuid jingsuba.
Ka KSU ka la pynbor ruh ban pynkylla ïa ki rukom treikam jong ka MPSC bad DSC, da kaba ong ba watla la pdiang ïa ki katto katne ki jingai jingmut jong ka MPSC Reform Committee 2025,hynrei kiba bun ki dang sahteng.
Ka la pyrshah ïa ki jingpynbna jong ka MPSC kaba khot ïa ki nongaplai kiba dei “ki nongshong shnong bashisha jong ka ri India” bad ka la ban jur ba ki kam jylla ki dei ban long tang ia ki nongshong shnong jong ka Meghalaya.
Ka riti treikam kaba don 15 tylli ki mat ba la aiti sha u Chief Secretary ha u bnai Risaw 2024 halor ki jingpynkylla ha ka DSC, ka la bynrap, ym shym la pyrkhat.
Ka KSU ka la pynkynmaw ruh ïa ka jingkular jong ka sorkar ban pass da ka Resolution ban pyrshah ïa ka jingtih Uranium bad ka la kyntu ruh ïa baroh ki Autonomous District Council ba kin thaw ïa ki ain halor katei ka phang bad ban pynkynriah noh ïa ka ophis jong ka Atomic Minerals Directorate na Nongmensong.