SHILLONG, Nailar 04: Ka HYC Mawlai Circle ka la pynlong ïa ka Tur Shaphrang Grassroots Upliftment 2026 League ha Mawlai Kynton Massar Artificial Turf, ha kaba 8 tylli ki kynhun ki la wan ban shim bynta ha ka kyrdan ïakhun U-8, U-10 bad U-12.
Ha kane ka lympung la wan ban shim bynta lang da ka PFR Football Academy, Mawlai sports club, Mawpat football academy, Sacred heart football academy, Sei La Ka Sap Socio Cultural Sports Club, “U SYMBAI” Football Academy, Rangdajied United FC bad ka Mawlai Grassroots Center.
Ha ka sngi sdang la wan ban sakhi lang u bah Donboklang Kharlyngdoh uba dei u President ka HYC Mawlai cicle, bah Rhembor saibon General secretary Mawlai circle. Bashan L. Mawnai vice president mawlai circle, bah Shanbor Marwein organising secretary mawlai circle ryngkat ka jingdon lang u Assistant Rangbah Mawlai kyntonmasar Shnong bad u Rangbah Dong kyntonmasar ka dong Block D, u bah Samborlang Diengdoh bad ki paidbah kiba wan ban sakhi ia kane ka jinglehkai.
Haba ai jingkren, u Bah Donbok u la sneng la kyntu ïa ki heprit ha kaba ïadei bad ka pule puthi, bad u la sneng la kraw ïa ki ban kiar na kino kino ki jingsniew bad ban ngeit sneng ïa ki kmie ki kpa kiba dei kita ki nonglam lynti ïa ki.
