Kynnoh ba hap siew ki kali kit masi 4000 tyngka shi pick-up bad 15000 tyngka shi trok ban ïohrung shapoh ka jylla

Nongpoh, Nailar 03: Ka jingkhrong pisa kaba shyrkhei lyngba u surok bah National Highway 6 ha Ri-Bhoi District kam dei shuh kaba dang thymmai man ki mrad kiba wan na shabar ka jylla naduh ki syiar, ki dohkha, ki masi, ki sñiang bad kiwei kiwei bad ïa kane ka jingkhrong pisa beaiñ la lap da ka seng Hills Farmer Union, Ri-Bhoi District mynta ka sngi haka jinghiar jong ki sha ka thaiñ Byrnihat bad u dak jingkylli ba heh u long, mano ba donkti ha kane ka kam beaiñ?
Kane ka jingkhrong pisa beaiñ kala paw pyrthei ruh hadien ba ki nongñiah ïaki kali kit masi kila phla ba ki hap ban siew haduh T.4000/- ïaki kali pick-up bad T.15000/- ïaki trok kiba kit masi kum ka bai rung sha ka jylla ha kaba ki number jong ki kali bala dep siew kila don lypa ha thanad Byrnihat, katba ki bym siew kim ioh ban rung sha ka jylla bad shah bat noh haki pulit ka Byrnihat Police Station.
Naka liang ki nongñiah kali kila phla ruh ba man ba kit masi ban rung sha ka jylla ki hap ban siew ïa katei ka pisa ha kaba kim lah ban tip mano ba donkti ban khrong namar ïaka pisa la dep siew lypa da ki trai masi bad maki ki dei tang ki nongkit bad ki hap pat ban pynthikna ïaki number kali haka khyrdop ha Byrnihat Police Station shuwa ba kin rung sha ka jylla la u number kali jong ki u la don ne em haka list.
Haba kren sha ki lad pathai khubor naka liang u Bah Alfonbirth Kharsyntiew General Secretary u la ong ba kum ka seng dang shen kala leit ban ïakynduh ïaka District AH and Veterinary Officer ban ïakren halor ka jingshah khrong beaiñ ki kali kit mrad kiba wan sha jylla, bad ban lap ïaka jingshisha baroh, kum ki nongïalam mynta ka sngi kila hiar sha Byrnihat ban lap ïaka jingshisha baroh kaba dei ka jaka kaba ki ju khmih bad talasi ïaki kali kiba la dep siew bad ki bym pat dew siew, bad kum ka seng kala lap shisha ba ka don kum kata ka rukom pynïaid bad siew ïaki kali kynthup ki kali kit masi.
U la ong ruh ba kum ka seng kala pyrshang ruh ban ïakren bad ki pulit kiba ap khyrdop ha Byrnihat hynrei naka liang jong ki kim lah ban jubab eiei halor katei ka bynta. Shuh shuh naka liang ka seng kala pyrshang ruh ban leit kynduh ïa u Officer In charge hynrei kim shym la ioh ban ïakynduh.
U la ong ruh ba ka jingkylli jong ka seng ka long kaba shai Balei ba hap ban Entry? Kumno hap ban entry namar naduh ka seng ka lap ba ym don ba peit ïaki kot ki sla watla naka liang u DC u la pynshai ba ki Enforcement ki lah ban talasi ïaki Health Certificate bad kumjuh ruh ki Transit Pass, namarkata naka liang ka seng ka kwah ban tip shano katei ka pisa ka leit? Mano ba lum ïa kane ka pisa?
Naka liang ka seng kala ong ba ka don kaei kaei sha lyndet, namar kum ka seng baroh shikatta ka ïakhun naka bynta ban ïada ïaki nongrep bad ki nongri jingri bad kum ka seng kan sa leit na kawei ka district sha kawei pat ban pyni ïaki sem ba thylli ba wat ka Blang kaba dei ka mrad kaba khlaiñ ka dang iap, bad dei nakata ka daw balei ngi mih ban dawa naka sorkar ba ka dei ban ai ïaka bai lutksan naka bynta nongrep bad ban map ruh ïaka ram jong ki, hynrei kumba la sakhi mynta ka sngi lada wanrah ïa ki sñiang ne ki masi kiba iap shisien bala dep siew ïaka bai entry phin ioh beit ban rung sha ka jylla bad kane ka long ka jingma kaba khraw ym tang ïaki nongri hynrei wat ki nongbam.
“Ki nongrep jong ngi ki duh mynsiem haduh katta katta bad kum ka seng kala ju dawa ban buh noh da ka khyrdop khnang ba yn lah ban khmih bñiah ïaki Health Certificate bad nangno la wanrah ïaki mrad? La kato ka jaka ka don ne em ka jingpang khlam ki mrad? Hynrei ngim iohi ïa kata, hynrei la iohi pynban tang ka jingshim pisa ban ioh rung kitei ki mrad shaka jylla bad wat ka ophisar jong ka Veterinary kala batai shai sha ka seng lyngba ka Prevention and Control of Infectious and Contagious Diseases in Animals Act, 2009 bad ki kyndon baroh kila don lut kumno ban wanrah ïaki mrad ba wan nabar bad ym don hok ruh mano mano ban shim pisa naki trai kali lane ki nongñiah kaba long kum ka jingdawa pisa” la ong u Bah Alfon.
Naka liang ki nongïalam ka HFU kila pynpaw ruh ka jingsngewsih kaba khraw ba katba ki dang ïakhun ban ai mynsiem ïaki khun samla haka jylla ba kin sdang ban ri jingri ban kamai namar ka jingkyrduh kam hynrei mynta ngi iohi patde na lyndet ki don pat ki khñiang kiba bam kruiñ ïaki briew jong ngi kiba pyrshang ban ieng hala ki jong ki kjat.
U Bah Alfon u la kren shai ruh ba kane ka jingïakhun kam pat kut mynta ka sngi watla ki donkam ban ïakynduh ïa u myntri sorkar ruh ban ïakren halor kane ka mat namar ban shah dawa pisa na kino kino ki mrad ka long ka bym lah ban pdiang bad kum ka seng ka pynrem jur.