Bthah ka ïingbishar HC ban buh synduk rit ha ki Bar Association ban ïoh thep shithi ujor ki Nongïasaid Aiñ kynthei

Shillong, Nailar 3 : Ka ïing Bishar High Court ka la bthah ba dei ban buh ïa ki syduk rit ha baroh ki Ophis jong ki Bar Association bad ha ka Bar Council ka Meghalaya khnang ba ki nongsaid aiñ Kynthei bad ki Intern kin lah ban pyntip ne ujor ïa ki jingeh, khamtam ba ïadei bad ka jingshah leh kynshleiñ.
ïa kane ka jingbthah la pynmih da ka division bench ka Chief Justice Revati Mohite Dere bad Justice W Diengdoh haba shong bishar ia ka WP (C) No. 350/2026.
U Sr Adv K Paul, uba mihkhmat ïa ki nongmudui, ula pyntip ha ïing Bishar ba ka Bar Council ka Meghalaya ka la pynlong ïa ka jingïalang ha ka 31 tarik Jymmang bad kala kut jingmut ban shimkhia ïa ka jingshngaiñ bad ka burom jong ki nongsaid aiñ kynthei bad ki samla pule kynthei ba wan leh intern.
Ula pan por ban ai ïa ka affidavit ka ban batai bniah ïa ki sienjam ba la shim.
Haba buh jingthoh ïa kane ka jingkular, ka ïing Bishar ka la ong “Ym donkam ban ong, ba ïa mynta bad kumba la kular da u Paul, ïa ki synduk rit dei ban pynlong kongsan ban buh ha baroh ki Ophis ki Bar Association bad ha ka Bar Council ka Meghalaya, kham kloi kat kaba lah bad lada lah ban leh hapoh kane ka taiew, khnang ba yn lah ban leh eiei ïa kano kano ka jingujor ba ïadei bad ka jingshah leh kynshleiñ ki nongïasaid aiñ kynthei bad ki intern”.
Ka ïing Bishar kala bthah ruh ïa ki nongmudui ban pynlong mamla ïa ka Bar Council of Meghalaya bad ka Bar Council of India khnang ba kin lah ban ai a ki jubab halor ki sienjam ba ki la shim ban pynthikna ïa ka jingshngaiñ bad ka burom jong ki nongïasaid aiñ kynthei bad ki intern. ïa kane ka kam la buh ban bishar biang ha ka 19 tarik Nailar, 2026.