Pynwai ka ïing bishar HC ïa ka mukotduma POCSO hadien ba ki shijur ki ladep ïathoh bad don khun

Shillong, Naitung 20 : Ka ïing Bishar High Court jongka Meghalaya ka la pynwai noh ïa ka mukotduma POCSO hadien ba ka la ïoh jingtip kaba thikna ba u nongshah kynnoh bad ka lanot ki la ïashong kurim bad ïasah lang lem bad I khun ba 3 snem ka rta.
Ka Chief Justice Revati Mohite Dere haba ailad ïa ka CrI.Petn. No. 62 of 2026, ka la kdat sharud ïa ka ejahar ba la register ha ka 28.06.2023 ha Williamnagar Women Police Station hapoh ka kyndon 5/6 jong ka POCSO Act. Kane ka mukotduma ka la sahteng kum ka Special (POCSO) Case NO. 14/2023.
Kat kum ka mukotduma, u nongshah mudui u Sitting G Momin ula don 25 snem bad ka lanot ka don hapoh 18 snem ha ka por ba ujor ïa ka ejahar.
Baroh arngut ki nongshah mudui hadien ki la kyrpad ban pyndam noh ïa ka ejahar halor ka nongrim ba ki don jingïadei, ïathoh ha ka 30.06.2026 bad hadien kila don ïa u khun shynrang.
Hadien ka jingbthah ka ïing Bishar ka High Court Legal Services Committee ka la aiti ïa ka kaiphod ba pynpaw ba kine ki shijur, kiba la don mynta 28 bad 19 snem, ki ïasah ha ka shnong Saminindikim, East Garo Hills.
Ka kaiphod ka ïathuh ba kane ka briew ka la ïasahlang bad une u nongmudui “namar ka jingieid bad jingsngewjan ïa u” bad kam don kano kano ka jingpyrshah ban pyndam noh ïa ka jingmudui.
Ki Pulit kila pynthikna ruh ba kiba haïing hasem ki la kyrshan ïa kane ka jingïadei hapdeng kine ki arngut ki shijur.
Ka ïing Bishar kala bthah ïa ka DCPO, East Garo Hills bad Secretary DLSA ban pynthikna ba kane ka briew bad I Khun ki dei ban ïoh ïa ka jingmyntoi na ki skhim kiba kynthup ïa ka Nirbhaya Fund, Mission Vatsalya, Ayushman Bharat bad Meghalaya Victim Compensation Scheme.
Ka ong ruh ba kano ka jingsiew bailutksan ba ai sha ki, dei ban buh ha ka fixed deposit tad haduh ba kane ka kynthei ka la kynjoh ïa ka 25 snem, ryngkat ka jingsiew ïa ka sut ba shisien laibnai sha ka.