Jan manla u snem shah rong ka jingkieng siej ha Lailad bad lait salit ki briew na ka umsaw

Nongpoh, Jylliew 17: Ki paidbah jong ka thaiñ Lailad ha Ri-Bhoi District ki dang ïakynduh biang ïa ka jingeh kaba ju jia man la u snem ha ka aiom slap, hadien ba ka jingkieng siej kaba ki pyndonkam ban ïaid ban ïeng sha ki jaka rep bad ki shnong ba marjan ka la shah rat noh ha ka umsaw jong ka wah Umtrew.
Katkum ka jingtip bala ioh lum, hadien ka jingther jong u lapbah ha kine ki khyndiat sngi ba la leit bad ka jingkiew kynsan jong ka um ha ka wah Umtrew, katei ka jingkieng siej ka la shah rong noh da ka umsaw hynne ka step ha ka por kumba 8 baje mynstep. Kane ka jingjia ka la wanrah ïa ka jingeh kaba khraw ïa ki paidbah kiba ju pyndonkam ïa katei ka jingkieng ban leit sha ki jaka rep, ki jaka trei bad ruh ban leit sha ki shnong kiba don sha shiliang ka wah.
La ong ba katei ka jingkieng kam dei ka sien kaba nyngkong ban shah pynjulor, hynrei jan man la u snem, tang shu poi ka aiom slap bad jur ka umsaw, ka jingkieng ka ju shah rat noh, kaba pynlong ïa ki paidbah ban hap shna thymmai.
Ki nongshong shnong ki la pynpaw ïa ka jingsngewkhia halor kane ka jingeh kaba la slem bad ki la ong ba ka jingdon tang da ka jingkieng siej kam long shuh ka jingïada kaba pura na ka jingshah rong ha ka umsaw. Kumta, ki la kyrpad ïa ka Sorkar bad ïa ki bor ba dei peit ba kin phaikhmat lem sha kane ka jingdonkam bad ban shna noh da ka jingkieng paka kaba skhem bad neh slem.
Ki paidbah ki ngeit ba lada don ka jingkieng paka, kan ym tang ban pynsuk ïa ka leit ka wan hynrei kan long ruh ka jingïada na ki jingeh kiba ki paidbah ki ju mad man la ka snem ha ka por slap.
La ioh jingtip ruh ba ka naka liang ka District Council kala mang pisa ban shna ïa katei ka jingkieng naduh u snem 2007, hynrei u kontraktor u la shu pynieng tang ki paia khlem da pyndep ïaka jingkieng kaba ki paidbah ki donkam bad angnud ban ioh bad khlem da don shuh ka jingbuddien ban pyndep ïa katei ka jingkieng.