Nongpoh, Jylliew 17: Ka skulbah Mahatma Gandhi University, kaba don ha 13 mer Tamulkuchi, kala rakhe ïaka International Day Against Drug Abuse and Illicit Trafficking 2026 hapoh ka “Nasha Mukt Shapat Abhiyan” ka ban sdang naduh ka 17 tarik haduh ka 26 tarik Jylliew 2026 ban ai jinghikai halor ka jingktah u drok bad kumno ngi donkam ïaka imlang ka sahlang kaba lait na u drok.
La sdang ïa katei ka prokram da ka jingbam smai ha kaba da ki spah ngut ki nongïashim bynta naduh ki NSS Volunteer, ki samla pule, ki nonghikai bad ki nongtrei katei ka skulbah kila shim bynta hakatei ka jingrakhe haka jingdonlang u Dr Sagar O. Manjare, Vice Chancellor, ka Mahatma Gandhi University, Meghalaya ban ïakhun ïa u drok bad ban im ka jingim kaba koit ba khiah.
Ïa katei ka prokram la pynlong da katei ka skulbah bad ka NSS Unit bad ha kine ki taiew jong ka jingrakhe yn sa pynlong ruh ki prokram ai jinghikai bapher bapher, ha kaba naka liang ki NSS Volunteer kin sa leit sha ki shnong bala jied ban pynsaphriang halor ka jingma u drok bad kumno ki khun samla ki dei ban kiar bad ban im ka jingim kaba lait na u drok bad ki jingdih buaid ryngkat ruh ka jingtreilang jong ki pulit ka Byrnihat Police Station.
