Ïapher ka dor umphniang na kawei ka petrol pump sha kawei pat sha u DC ujor ka NRAO&DA
Ïoh kamai sahuh ki auto rickshaw na Assam
Nongpoh, Jylliew 09: Da ka jingsngewkhia kaba jur halor ka jingkiew dor ka umphñiang petrol bad diesel bad nalorkata ka jingsuba leh buit tuh da ki petrol pump namar ka jingïapher ka dor na kawei ka petrol pump sha kawei pat kiba don ha Ri-Bhoi District, ka Nongpoh Region Auto Owners & Drivers Association (NRAO&DA) mynta ka sngi kala leit ban ujor syndon sha u Deputy Commissioner ka Ri-Bhoi District u Abhishek Saini halor katei ka mat.
Haba kren sha ki lad pathai khubor hadien ka jingleit kynduh naka liang u Bah Tony Shylla Vice President ka seng haka jingdonlang u Bah Banasar Lyngdoh Nonglait President, u Bah Felix A Nongsiej Secretary u la ong ba kum ka seng kala leit ban ïakynduh bad ujor sha u DC ka Ri-Bhoi ha kaba ïadei bad ka jingkiewdor palat ka umphñiang bala suba ruh nalor ka jingkiew dor kala don ka jinglehbuit tuh ki trai petrol pump kiba la shna hi ïaka dor umphñiang namar ka don ka jingïapher na kawei ka petrol pump sha kawei pat.
Shuh shuh ka seng kala ioh ruh ban pynpaw hakhmat u DC halor ka jingshah ktah ka kamai ka kajih namar ka jingiohlad jong ki auto rickshaw naka jylla Assam kiba dei ban kamai tang ha Assam, hynrei ki ioh ban kamai sahuh sha Ri-Bhoi District wat shaduh Nongpoh bad kaba la pynlong ïaka seng ban dap da ka jingsngew lyngngoh ba kumno kitei ki auto ki iohlad ban wan sha Meghalaya, katba ki auto na kane ka district lada ki leit tang ha Jorabat ruh kila shah bat haki pulit ka Assam.
Ha kaba ïadei bad katei ka mat ba ka seng ki nongñiah auto kala pynsngew sha u DC, naka liang u DC ka Ri-Bhoi u la kular ban shimkhia ïa kane ka jingujor bad ban pynlong ka jingjurip ïaki petrol pump bad kumjuh ruh ban bthah ïaka tnad Transport ban tehlakam ïa kitei ki auto kiba la ioh ban wan kamai sahuh sha kane ka district.
Haka juh ka por naka liang ka seng kala maham ruh ïaki auto kiba ju mlien ban kit bad die kyiad bad ban pynjah burom haka kyrteng ka seng bad kum ka seng kam don jingkitkhlieh ïa ka jingleh ki dkhot ïa katei ka jait kam bad lada ki shnong ki lap ki lah ban leh katba mon katkum ka jingsngewbit jong ki, bad kum ki nongïalam kin sait kti namar kim pynshlur ïaki nongñiah auto ba kin leh kum kitei ki jait kam.