Ym lah tehlakam shuh ki pulit ïa ki dkhot JNC, JSU bad paidbah ba tur bad rung hapoh ophis DC Khliehriat

Khliehriat, Jymmang 20 : Ha ka jingïatur sha ophis u Deputy Commissioner ha Khliehriat da ki sengbhalang ba kynthup ka Jaiñtia National Council , ka Jaiñtia Students Union lem bad ki paidbah nongrep kiba napoh elaka Nongkhlieh, ki bor pulit jong ka East Jaiñtia Hills District kim lah shuh ban tehlakam ïa u paidbah haduh ka la don ka jingiakhru hapdeng ki bor pulit bad ki paidbah haduh ba ki paidbah ki la ioh ban rung puk shapoh ophis u DC.
Shuh shuh, ka la mih ruh ka sur na ki nongrep bad na ki sengbhalang kaba la ong bad kynnoh ba u myntri rangbah ka jylla, u Conrad Sangma, u Symbud myntri rangbah, u bah Sñiawbhalang Dhar ki don kti lang bad ka Shree Cement company bad ki la shu thom da ka bor ïa ka hok jong ki paidbah nongrep kiba ju rep ju riang ha Lum Shyrman ha elaka Nongkhlieh.
Na ka liang u President ka JNC, u bah Sambormi Lyngdoh, u la ong ba ha kaba iadei bad ka jingthmu khlong mawshun ka company Shree Cement na Lum Shyrman, kaei kaba paw shynna ka long ba ka la don ka jingshahknieh jubor ïa ki jaka rep jong ki nongshong shnong bad kane ka la pynbitar ym tang ïa ki paidbah nongrep hynrei ka la pynbitar ruh wat ïa ka seng, u la kynthoh jur ruh da kaba ong ba kane ka paw shai ba u myntri rangbah ka jylla, u Conrad Sangma, u Symbud Myntri rangbah, u Sñiawbhalang Dhar ki don kti lang bad ka company Shree Cement na kata ka daw ki la shu thom da ka bor “ Shuh shuh ngi la ioh jingtip na ki brie kiba napoh elaka Nongkhlieh bad ki don ki trai jaka kiba la ioh ïa ka jingsiew da ka cheque hynrei ynda ki la mut leit shim ïa ka pisa ki lap pynban ba ka cheque ka Bounce bad ki khlem ioh pisa ei ei ruh, ta kane ka paw ba kam dei tang ka jingmut ba kin shim ïa ka jaka da ka bor, hynrei kane ka dei ruh ka kam thok, kam shukor ne ka Fraud Case, ngi sngewthuh bad ngi tip ba u myntri rangbah u tip lut ïa kaei kaba jia ha East Jaiñtia Hills, hynrei balei pat u sngap jar jar? Te lada ka dei shisha ka company jong u myntri rangba ngi kyrpad ïa u ba un rah noh sha Garo Hills bad sa leh katba mon bad hangne ha East Jaiñtia te u hap ban burom ïa ki tra jaka bad lada um burom shuh ïa ki briew kiba dei ki trai jaka, ngi ruh ngin nym burom shuh ïa ka party NPP” ong u bah Sambormi Lyngdoh.
Shuh shuh ruh na ka liang u bah Forgive Dkhar, uba na shnong Sutnga, uba don jaka hapoh elaka Nongkhlieh ha kaba ïa ki jaka jong u ruh la shah thom bor ha ka company Shree Cement khlem ka jingtip jong u bad u la shah pyni bor ruh ha ki briew ka company kiba khlem burom shuh ïa u kum u trai jaka, une u rangbah ruh u la kynnoh bad kynthoh jur da kaba ong ba u Conrad Sangma bad u Sñiawbhalang Dhar ki don kti lang bad ka company Shree Cement, u la batai shai ïa ka jingiaid lynti jong u kaba da ka aiñ, kaba da ka akor burom ban ioh pat ïa ki jaka ba la shah knieh, u la iakynduh bad kyrpad ïa u bah Sñiawbhalang Dhar, kumjuh ruh ïa u DC bad SP ban shim khia ïa kane ka kam hynrei kam poi shano shano ruh bad kane ka jingleh kuman leh mutlop jong u Symbud Myntri rangbah, jong u DC, SP ka la pynbitar shikatdei eh ïa u bad u la leit ban ujor noh sha ka ïingbishar bad haduh mynta kane ka kam ka dang sah ha ka iingbishar, ha kaba u la iakhun ban ioh ïa la ka jong ka hok kum trai jaka.
Ka la mih ruh ka jingbyrngem ban khang tala ïa ka DC ophis ban khanglynti ïa u DC bad ki heh sorkar ha ka sngi ba long public hearing kata lada ka sorkar kam pynsangeh noh ïa ka public hearing kumba la dawa da kine ki ar tylli ki seng bad dawa da ki paidbah nongrep.
Ha kane ka jingiatur sha DC ophis mynta ka sngi la lap ruh ba ki paidbah nongrep kiba napoh elaka Nongkhlieh ki la ïa wan bad kynthei bad shynrang kynthup ruh ki tymmen bad ki la pynpaw ïa ka jingkthang mynsiem jong ki da kaba sngew bynnud haduh katta katta ban duh noh shyrta ïa ki jaka ba ki ju rep bad im ja kpoh na ka rep ka riang bad ki la kheiñ duh ialade da kaba ki la ïa tur lang bad ki dkhot sengbhalang pyrshah ïa ki bor pulit ban ioh ban rung hapoh ophis DC bad ynda ki la ioh rung shapoh ki la shong kyllaiñ myngor syndon ha ophis u DC da ka jingkhmihlynti ban sngew ïa ka rai na ka sorkar ban pynsangeh noh ïa ka public hearing.