Shillong, Jymmang 21: Ka kynhun ki nongïalehkai (shynrang & kynthei) jong ka East Khasi Hills District ki la synshar ïa ka kyrdan ba ha khlieh duh ha ka sngi ba ar (Day 2) jong ka State Level Inter School Athletics Meet, 2026 kaba la pynlong ha Sports Authority of India (SAI) STC, Mawkynroh, (NEHU Campus), Shillong.
Ka EKHD ka la ïalam hakhmat da kaba kamai 85 poiñ (41 poiñ na ki jingïalehkai jong ki khynnah shynrang bad 44 poiñ na ki khynnah kynthei). Ha ka kyrdan kaba ar la wan bud da ka West Jaiñtia Hills District da 35 point, kaba la noh synñiang shibun da ki khynnah kynthei da 21 point.
Kaba bud najan ha ka kyrdan kaba lai ka dei ka East Jaiñtia Hills District kaba kamai 32 point, ha kaba ka jingnoh synñiang jong ki khynnah shynrang ka long 14 point bad ki khynnah kynthei 18 point.
kane ka lympung kaba la sdang naduh hynnin ka sngi Balang, la pynlong da ka Meghalaya Athletics Association ha ka jingïatrei lang bad ka Directorate of Sports and Youth Affairs, jong ka Sorkar Meghalaya.
Ka sngi ba ar jong kane ka lympung ka la plie da ka jingïakhun phainal ha ka ïakop mareh kaba 5000M na ka bynta ki khynnah shynrang bad kynthei kiba hapoh 18 snem. La bteng ïa ka sngi da ki phainal ha ka ïakop mareh kynthup ïa ka 400M, 600M, bad 1000M.
Nalor ki jingïakop mareh, ki nongïalehkai ki la ïa shim bynta ha ka Discus Throw, Javelin Throw, High Jump, Long Jump, bad ka Shot Put ha la ki jong ki kyrdan katkum ka rta. Ki nongïalehkai ha ka kyrdan Under-14 ki la ïaid shakhmat lyngba ki jingïalehkai Triathlon, kiba kynthup ïa ka 60M sprint, Long Jump bad ka Back Throw.
Ka jingïalehkai ba kyrpang ha kane ka sngi kadei ka jingïakop mareh jong ki kynhun, ba kynthup ïa ka 4x100M, ka Medley Relay, bad ka phainal ha ka 4x400M Relay ha ka kyrdan Under-16 bad Under-18. Nalor kata, ha kane ka sngi la kynthup ruh ïa ka Kids Javelin Qualification Round na ka bynta ki khynnah kynthei kiba hapoh 14 snem.
Kane ka lympung kan poi sha kaba kut mynta ka sngi, ha kaba ki jingïakop ba khatduh kin sdang ha ka por 9:00 baje mynstep. Hadien ba la pynkut ïa ki jingïalehkai, yn pynbud sa ka jingïalang pynhap pyrda ha kaba yn sam ïa ki takma sha ki nongjop bad ki District na ka bynta ka jingïalehkai jong ki.
