Pynkup burom u Bah Sanbor ïa ki thei ïalehkai ka Lumparing Sports Club

Shillong, Jymmang 17: Ki thei ïalehkai jong ka Lumparing Sports Club kynthup ïa ki coach bad ki nongkitkam ki la shah pynkup burom kyrpang ha u MLA ka Shillong South ba dei ruh u Myntri Sorkar ka Jylla Bah Sanbor Shullai ha ka jingïalang kaba long ha Lumparing Indoor Stadium.
Kane ka jingpynkup burom ka dei halor ka jinglah jong ki bn khur ïa ka nam lahduh ha ka lympung ïalehkai jong ki kynthei ba tip kum ka SSA Women’s Football LeagueTournament 2025-26 kaba dang shu lah shen ha u Kyllalyngkot mynta u snem ha madan Polo.
La donlang ruh ha kane ka sngi naduh ki Nongkitkam Shnong, ki kmie ki kpa bad kumjuh ki bahaiing jong kine ki samla kynthei kiba la wanrah ka burom kaba khraw ïa ka shnong da ka jingjop ha kane ka lympung ïalehkai kaba heh.
Shwa kane, na ka liang u President jong ka Lumparing Sport Club, u Bah Ïaineh Nongkhlaw u la ong ba kum ka Club ki sngewnguh haduh katta katta ïa u MLA uba ïai don beit ha syndah bad ki naduh kaba sdang bad tad haduh ba kin da ïoh ban rah ïa ka nam lahduh ha kane ka lympung.
Na ka liang u Bah Sanbor pat u la ong ba kum u Nongmihkhmat u dap da ka jingkmen kaba khraw ba ka kynhun kaba dei na ka constituency jong u ka ïoh ban rah ïa ka nam lahduh ha ka lympung ïalehkai kaba heh. U la ai ka jingïaroh ïa ki nongpynïaid jong ka club bad ïa ki coach kumjuh ïa ki kmie ki kpa kiba la shah laitluid bad kyrshan ïa ki khun samla jong ki haduh ba kin da ïoh ban khur ïa ka jingjop kaba don burom.
Ha kane ka sngi ki la don haduh 36 ngut kiba shah pynkup burom. Nalor ki jingai buh sah jingkynmaw bad kiwei ki jingai sngewbha na ka liang u la ai lang ruh ka khusnam pisa sha baroh.
Kumban shu kdew hangne, ki thei ïalehkai ka Lumparing ki la ïoh ban pynliem haduh 3-1 kol ïa ka Laitkor ha ka jingïaknieh ïa ka nam lahduh jong ka SSA Women’s Football League kaba long ha u Kyllalyngkot.