40 tylli ki skul bad 800 ngut ki nongïashimbynta ha ka 12th SWKH District Level Inter-School Athletic Meet 2026 ha Mawlangwir

Mawkyrwat, Ïaïong 29: Ka ophis jong u District Sports Officer (DSO), South West Khasi Hills District ryngkat ka jingïatreilang bad ka South West Khasi Hills District Athletics Association mynta ka sngi ka 29 tarik u Ïaïong, 2026 ka la ïoh ban plie pyrda ïa ka 12th South West Khasi Hills District Level Inter-School Athletic Meet (SWKHDLI-SAM) 2026 ha Rowell Lyngdoh Stadium, Mawlangwir, South West Khasi Hills District.
U Bah B. Kharjana, Additional Superintendent of Police ka South West Khasi Hills District, u la long kum u kongsan ha kane ka jingïalang ha ryngkat ka jingdonlang u bah D. Syngkon, District Sports Officer, South West Khasi Hills District lem bad kiwei de.
Haba kren ha ka jingïalang, u bah B. Kharjana, Additional Superintendent of Police ka South West Khasi Hills District u la ai mynsiem ïa ki khynnah skul ba lada ki kwah ban kiew ha ki kam ïalehkai kim da donkam eh ban pynlut ka spah ka phew ne kiwei de ki jingpynlut hynrei kaba donkam ka long tang ka jingtrei shitom ryngkat ka jingkut jingmut. Ula ong shuh shuh ba ka jingduh kam lah ban khang lad lada ki don shisha ïa ka jingthrang ha ka mynsiem ban kiew shaphrang ha ki kam ïalehkai.
Namarkata, u bah Kharjana u la ong ba ki khynnah skul ki dei ban long borabor kiba pynlut por ha kiei kiei kiba lah ban tei ïa ka jingim jong ki ym ban pynlut por ha ki bym tei ïa ka jingim kum ka jingjaituh, ka jingmlien ha ki kam sniew kum ka jingdih drok bad kiwei de kiba long pynban ka jingpynduh bor ne pyntlor bor ïa ka jingim. “Ïai long borabor da shisha ki khynnah skul kiba don ka thong ha ka jingim khnang ba kin lah ban poi sha kata ryngkat ka jingaiti lut ha ka kam ba ki ki leh”, ong u bah Kharjana.
Shuh shuh u la ong ruh ba kane ka jingïakob ka long ruh kawei na ki lad ba kordor ba ki khynnah skul kin ïa pyni ïa ki sap bad ka jinglah jong ki ha ki bynta bapher bapher jong ki jingïalehkai sports ba la pynlong ha kine ki lai sngi kata naduh mynta lka 29 tarik u Ïaïong, 2026 haduh ka 1 tarik u Jymmang, 2026.
Ha kane ka jingïalehkai kaba heh ha ka district, la don haduh 40 tylli ki skul bad kumba 800 ngut ki nongïashimbynta kiba la wan ban ïakhun ha ki jait jingïalehkai bapher bapher. Kine ki jingïalehkai ki kynthup ïa ka jingmareh thong, ka shot put, ka high jump, ka javelin throw bad shibun kiwei de ki jingïalehkai ha kine ki lai sngi.
Ha ka sngi plie pyrda, la wan sakhi lang ruh da ki nonghikai, ki khynnah skul bad ki paidbah kiba bun kiba la ai mynsiem bad kyrshan ïa ki nongïashimbynta ha ki jingïalehkai bapher bapher.