Naba ym don ka jingïatreilang ka sorkar jylla naduh u snem 2005 bad ki MP: KAS

Shillong, Ïaïong 28: Ka Khasi Author Society (KAS) ha ka sngi baar ka la pynpaw ka jingai khublei ïa u Lat ka jylla uba la ai ka jingmynjur ïa ka ordinance ne ka hukum ba la pynbna da ka sorkar jylla ban pynlong noh ïa ka ktien Khasi kum ka ktien sorkar bad na ka liang ka seng ka la ai khublei ruh ïa baroh kiba la kyrshan ïa ka jingdawa jong ka ban ithuh bad pynrung ruh ïa ka hapoh ka khyrnit kaba 8 jong ka riti synshar ka ri bad pynpaw pat ka jingsngewdiaw ba naduh u snem 2005 ba la ïa dawa ban pynrung ïa ka hapoh ka khyrnit kaba 8 hynrei na ka daw ka jingbym ïatreilang ka sorkar jylla bad ki MP ka jylla kane ka la slem noh.
Haba kren ha ki lad pathai khubor u President ka KAS u Dr. D R L Nonglait u la ong ba kan long ka jingai khublei kaba khraw ïa u Lat ka jylla, nangta ïa ka sorkar jylla, ïa ki MLA bad kumjuh ruh ïa ki sengbhalang bapher bapher kiba la kyrshan ïa kane ka jingdawa jong ka KAS.
“Ngi sngewnguh ïa kane ka jingai jingmynjur jong ka u Lat ïa ka hukum ba la rai da ka sorkar halor ka ktien Khasi hynrei ngi sngewdiaw pat naba ïa ka Ktien Khasi ym pat lah ban pynrung hapoh ka khyrnit kaba 8 jong ka riti synshar jong ka ri,” ong u Dr Nonglait da kaba pynpaw ruh ka jingkyrmen ba ka sorkar jylla kan ïai buddien bad ïai tynruh ïa ka sorkar pdeng ba kan mynjur noh ha ka dorbar bah (Parliament) jong ka ri ka ban sa long.
U la ïathuh ruh ba kane ka jingdawa ban pynrung ïa ka ktien Khasi hapoh ka khyrnit kaba 8 ka la ïaid shakhmat naduh u snem 2005 ha kaba u (L) Dr. D D Lapang u dang long u Myntri Rangbah ka jylla, hynrei ha ka jingïai buddien jong ka seng la lap pat ba kane ka la sahteng haduh mynta naba ym don ka jingïatreilang hapdeng ka jylla bad la ki jong ki MP.
U la ïathuh ruh ba ka jylla Mizoram ka la ïoh ka jingithuh ïa ka ktien Mizo kum ka ktien sorkar naduh u snem 1972 ha ka por ba ka dang dei ka Union Territory bad wat hadien ba la ïoh la ka jylla ruh ha u snem 1978 ka nang neh hynrei ki khlem ïakhih tyngeh ban pynrung ïa ka hapoh ka khyrnit kaba 8.
“Kumta ngi kyrpad ïa ka sorkar jylla, ki nongmihkhmat bad kumjuh ruh ki MP ban ïatreilang kawei kumba leh ka jylla Assam, ka jylla Manipur khnang ba ka sorkar pdeng kan sngap ïa kane ka jingdawa kaba wan na ka jylla ban pynrung noh ïa ka ktien Khasi hapoh ka khyrnit kaba 8,” pynpaw shuh shuh u President ka KAS.
Na ka liang ka KAS ka la kyrpad ruh ïa ka sorkar ba ha ka por ba ka thaw ïa ki kyndon ba kadei ban ïasyllok lang bad ki dkhot jong ka, khnang ba yn lah ban thaw bha ha kata ka rukom kaba biang lang khnang ban lah pynurlong ban pyndonkam ïa ka Ktien Khasi shaduh ki kyrdan pule ba shalor ne degree level.