Shillong, ïaïong 29: Ka Mawlai SC ka la mad ïa ka namrem da 3-1 kol ha ka jingïakhun pyrshah ïa ka Sunrise Club Orissa ha ka Group A jong ka lympung I-League-3 2025-26 kaba la long ha Khuman Lampak Stadium, Imphal hynne ka step sngi Balang.
Ka Mawlai kaba la jam sha kane ka jingïakhun lyngba ka jingjop da 3-1 pyrshah ïa ka Sikkim Brotherhood ar sngi mynshwa, ka la hap ban ïalehkai pyndep da tang 10 ngut ha madan naduh ka minit kaba 54, hadien ba ïoh red card noh u Ricky Chyne.
Ha ka kylla step la sakhi tang kawei ka kol, ha kaba ka Sunrise Club Orissa ka la lamkhmat ïa ka jingïalehkai lyngba u Sanjit Khora (22′). Nangta poi sha ka minit kaba 54 jong ka kylla miet, ka Mawlai ka la shah pynduna sha ka 10 ngut shuwa ba kan pynïakhaid shipor lyngba u Wadshwa Latoo (65′).
Tang mar hangta hi ka Sikkim Brotherhood ka la ïoh ba kan lamkhmat biang lyngba ka kol ba la thep da u Arpan Lakra (66′) shuwa ba u Arbin Lakra (80′) un thep ïa ka kol kaba lai ban pynthikna ïa ka jingjop.
U coach ka Mawlai u bah Hering Shangpliang u la wanrah tang kawei ka jingpynkylla ïa ka kynhun ïalehkai ba sdang, da kaba wanrah ïa u Arkini Laloo na ka bynta u Shariwell Lyngdoh.
Ka Mawlai kan pynkhreh mynta sa ïa ka jingïakhun pyrshah ïa ka ARA FC ha ka 03 tarik u Jymmang ha ka por 9 baje mynstep.
Ki rangïalehkai ka Mawlai kiba la mih madan hynne ka sngi Balang:
Lambhamiki Lamare (GK), Arkibor Makhroh, Arkini Laloo, Verjelous Shylla, Damanbhalang Chyne, Robertson Khongriah, Wadshwa Latoo, Samlang Rympei, Ricky Chyne, Fairming Suting, Basuklang Bina (sub Vincent Shyrmang 62′)
