Deepak Kumar Nayak
Research Associate Institute for Conflict Management
Ka jingïakhun ka Communist Party of India-Maoist (CPI-Maoist) lyngba ki kam kaikhlaw ha India, kaba la ju batai kum ka “jingma kaba khraw tam hapoh ka ri”, mynta ka la poi sha ka bynta kaba kongsan ha ka histori. Ha ka 22 tarik Rymphang 2026, u Nambala Keshava Rao ba ju khot sin Basava Raju, ba ju khot sin Devji, ba khot sin Sanjeev ba khot sin Sanjeeva ba khot sin Ramesh ba khot sin Kumma ba khot sin Shankar ba khot sin Sheshu ba khot sin Jagan ba khot sin Sudharshan bakhot sin Devanna (60 snem ka rta u General Secretary, Strategist, bad u khlieh jong ka Central Military Commission (CMC) jong ka CPI-Maoist, u la pyndem wait hakhmat ki Pulit ka Telangana.
Ka jingpyndem wait jong u ka la kdew kum ka jingkylla kaba kongsan tam ha ki kam kaikhlaw kaba la neh da ki phew snem. Katkum ki jingïathuh khubor bapher, u Devji bad u Malla Raji Reddy ba ju khot sin u Sangram (76 snem), u dkhot jong ka ‘Central Committee (CC)’ bad ‘Politburo’, ki la pyndem lang bad 21 ngut ki dkhot hakhmat ka Special Intelligence Bureau (SIB) jong ki Pulit ka Telangana. Ka jingpyndem jong u Devji kam dei tang ka jingduhnoh ïa ki dkhot ba ehrang, hynrei ka pyni ïa ka dak ka jingkhyllem jong ka bynta bakongsan tam jong kane ka kynhun lehnoh. Kane ka la jia tang katto katne taïew shuwa ban kut ka jingaipor kaba khatduh ha ka 31 tarik Lber da ka Ministry of Home Affairs ka Sorkar Pdeng ban pynjah syndon ïa ka Left-Wing Extremism (LWE), ka ai dak ïa ka jingkylla kaba shisha ha ka jingïakhun kaba la neh la bun snem.“
Ka jingpyndem wait u Devji ka pynpaw ïa ka jingpynkhih kaba jur ïa u budlum treikam jong ka CPI-Maoist. Kum u nongïalam bad u briew uba don ïa ka buit treikam ba la slem, uba la ïathuh ba u la shimti hadien ka jingïap jong u Nambala Keshava Rao uba ju khot sin Basava Raju – uba la shah pynïap ha ki bor pahara ha ka 21 tarik Jymmang 2025 – u Devji u dei uba kongsan ha ka Pilitary Planning jong ka kynhun bad ha ki kam runar jong ka People’s Liberation Guerrilla Army (PLGA).
Ki ophisar ki la ong ïa ka jingmih noh jong u Devji na ka kynhun ka la long kum ka jingpyntroiñ ïa ka kynhun kaba la shah kheiñ beaiñ. Ka jingïoh kem lane jingpyndem jong u nongïalam kum u Devji ka duna bha bad ka pyni ba ka jingïalam kaba halor jong ki Maoist ka lah ban ym khie khlieh shuh bteng ïa ki kam kaikhlaw ha ki bynta bakongsan kum ha Bastar, Abujhmarh bad ki khlaw ba marjan, da kaba mad ïa ki jingeh wat ha kaba pynrung dkhot thymmai, ka jingbat ïa ki dkhot, ka jingbuhrieh ïa ki tiar siat ban lait na ki jingshah khynra ha ki bor pahara.
Ka jingpyndem wait jong u Devji ka la urlong hadien bun bnai lyngba ka jingtreikam jong ki bor pahara, khamtam ha Karregutta Hills (hapdeng Telangana bad Chhattisgarh), ha kaba ki bor synshar ki la ïathuh ba ki la lah ban pynpra ïa ki Operational Base lane ki ktem treikam bad ïoh kurup ïa ki tiar pynbthei, da kaba thmu manla ka por ban pynlong sohpdung ïa ki nongïalam bad ban pynjulor ïa ki kor ki bor treikam.
Ka rukom treikam jong ka Sorkar kaba ïa khleh lang bad ki jingma ryngkat bad ki lad ai jingïarap ïa ki riewpaidbah, ka la ïarap ban wanrah ïa ka jingpyndem wait kaba bteng ha kine ki ar snem ba la leit noh. Ki bor synshar ki kam ba ki don da ki spah ngut ki nongïalam bad bad ki dkhot ka sseng Maoist ki ladep wan phai biang sha ka imlang sahlang lyngba kine ki skhim.
Ka jingpyndem wait jong u Devji ka lah ban long kum ka jingpynjem, kaba lah ban pynmih ïa ki jingkulmar jingmut hapdeng ki dkhot ba dang sah jong ka Maoist, katba ka bor jong ki ka nang tlot hapoh ka seng, kaba lah ban pynkha ïa ka jingïapait hapoh ka party kaba dang bteng ban ïakhun da kaba kieng atiar. Hynrei, katto katne ki nongïalam ba kham snar kin jied da kaba ïakhun haduh kaba kut. Ban ong ba la lah ban pynliem ïa ki kam kaikhlaw kiba la neh da ki phew snem ïa mynta hi kan long kaba dang kloi palat. Watla ki la duh ïa ki nongïalam, ki bynta jong ki dkhot kiba don ïa ki tiar siat ki dang sah, khamtam ha ki khlaw ki barben. Shuh shuh, lada ym don ka jingpynbeit kaba shisha ïa ki mat ba kongsan kiba pynkha ïa ki kam lehnoh, ka saiñpyrkhat jong ka kynhun kieng atiar ka dang lah ban neh, watla ka bor treikam kala nang duna.
Ka jingpyndem jong u Devji ka la long ka lad kaba kongsan tam ha ka jingïakhun kaba la slem jong ka India pyrshah ïa ki kam kaikhlaw jong ki lehnoh Maoist, kaba pyni ïa ka bynta ba kongsan ba ka donkam ïa ka jingpynbor na ki bor pahara, ki lad jingïarap, ban pyntlot ïa ka jingtreikam hapoh ka CPI-Maoist. Hynrei, ban ong ba kane ka dei ka jingkut kaba shisha kam pat lah ban urlong. Katba ka dang thylli ha ki kam nongïalam bad na ki jingpyndem wait khah khah ka la nang pyntlot shuh shuh ïa ki rukom treikam, ki daw jong ka jingïakynad, ka jingïasam jingtip hapdeng ki dkhot, ka jingeh ha ka liang ka imlang ka sahlang kiba ktah ïa ka thaiñ bad kiba dang long ki mat ba kongsan ban rai ïa kaei kaba bud hadien habud.