7296 ngut kiba pang ‘ñiangkulia ha Meghalaya, bun tam eh ha East Jaiñtia Hills
![](https://mawphor.com/wp-content/uploads/2022/08/Hiv.jpg)
Shillong, Ïaïong 26: Ka Project Director jong ka Meghalaya AIDS Control Society ka Dr B Decruce ka la ïathuh ba ka jingdon kiba ïoh ïa u ‘ñiangkulia ha ka jylla haduh u bnai Kyllalyngkot mynta u snem ki don haduh 7296 ngut tang kiba la dep ban rejistar bad ka Society bad ong ba napdeng ki District kaba jur eh ka dei ka East Jaiñtia Hills bad bud pat sa ka West Jaiñtia Hills.
Ha ka jingïakren bad u Mawphor ka Dr B Decruce ka la ong ba ka jingdon kiba ïoh ïa u khñiang jingpang ha ka jylla ka long kaba hap phikir bha namar ka jingdon kiba pang ka khamtam ban ïa ka National Average.
“Lada ngi nujor bad kiwei ki jylla bad wat bad ka National Average ruh ngi kham tam ma ngi namar ha ka National Average kiba ïoh ïa une u khñiang ha ka thup Adult Prevelent Rate ki don 0.21%, katba ha ka jylla jong ngi pat ki don haduh 0.42% bad lada shim na man ka shihajar ngut kiba don ïa une u khñiang ki don haduh 0.37%,” ïathuh ka Dr B Decruce.
Ka la ïathuh ruh ba ka lynti kaba une u kñiang u saphriang na uwei sha uwei ka dei lyngba ka shongkha hapdeng kiba la shah ktah bad ki bym shah ktah khlem da pyndonkam ïa kino kino ki lad jingïada.
“Ka lad ba une u khñiang u ïoh ban saphriang ha ki snem kiba la leit ka dei beit na ka jingshongkha hapdeng kiba la shah ktah bad kiba dang lait na une u khñiang jingpang hynrei ha une u snem ba mynta ka jingsaphriang na ka jingpyndonkam lang da ujuh u thyrnia hapdeng kiba dih drok ruh ka la kynrei bha,” ka la ong.
Haba kylli ïa ki lad kiba na ka liang ka sorkar bad ka Society ka shim na bynta ban ïada ïa une u khñiang, ka Dr B Decruce ka la ïathuh ba ka Society ka la shim bun bha ki sienjam ban pynsngewthuh kumno bad ïada na ka jingshah ktah na kane ka jingpang.
“Ngi pynlong shibun bha ki jingpynshai paidbah ban pynsgewthuh ïa ki jingphriang une u khñiang jingpang bad ngi leit ruh sha ki kolej bad ki skul ban ai jingpynshai kumno ban ïada ïalade na kane ka jingpang,” ka la jubab.
Ka Dr B Decruce ka la ïathuh ruh ba baroh ki jaka ai jingsumar ka sorkar ba kynthup naduh ki PHC ki la lah ban test ïa kane ka jingpang.
Shuh shuh ka la ïathuh ba namar kane ka jingpang ka dei kaba ym lah ban pynkoit ka long kaba donkam haduh katta katta.
“Namar kam dei ka jingpang ba ngi lah ban pynkoit hynrei lada dih dawai ka met jong kito kiba ïoh ïa une u khñiang ka lah ban teh lakam ïa ka jingkharoi une u khñiang jingpang,” ka la ong.
“Ngi kwah ban kyntu ïa ki nongshong shnong ka jylla khamtam kiba don ha kito ki jaka ba la jur ka jingsaphriang ban wan shakhmat ban shah test namar dei tang da kaba test ngi lah ban ïada ym tang ïalade hynrei wat ïa kiwei pat ruh,” kyntu ka Dr B Decruce.