Shillong, Ïaïong 26: U Myntri ka tnat Social Welfare Department jong ka sorkar jylla u Bah Paul Lyngdoh ha ka sngi Nyngkong u la kular ba ka sorkar jylla kan shimkhia ban pynrung Aadhaar lut ïa ki nongshong shnong ka jylla khnang ban ka jingmyntoi na ki skhim sorkar pdeng kin tuid sha kiba dei hok ban ïoh.
Haba shim bynta lyngba ka Video Conference ha ka review meeting ba la pynlong da ka tnat Women and Child Development jong ka sorkar pdeng ba shim bynta ruh da ka myntri ka sorkar pdeng ba dei peit ïa kane ka tnat ka Smriti Irani.
Kane ka jingkular jong u Bah Paul ban shimkhia ïa ka jingpynrung Aadhaar ka dei hadien ba ka tnat Women and Child Development jong ka sorkar pdeng ka la ai jingkynthoh ïa ka jylla Meghalaya ha kaba ïadei bad ka jingpynbha ïa ki Anganwadi Centres, ka jingpyntreikam ïa ki skhim bapher bapher ba kynthup kum ka POSHAN Abhiyan, ka Saksham Anganwadis bad kiwei kiwei kiba ïadei bad ki kynthei bad khynnah khunlung ba kiba bun ki skhim ym lah ban pyntreikam pura ha ka jylla namar ba kito kiba dei ïoh jingmyntoi kim don ïa u Aadhaar.
Na ka liang ka tnat Social Welfare Department ka la ïoh jingïaroh ruh na ka tnat Women and Child Development ka sorkar pdeng halor ka sienjam ba ka la shim ban rat dyngkhong ïa ka jingkynrei ki khynnah kiba duna kiba ïoh ban bam ïa ki jingbam teimet.
