Shillong, Iaiong 26 : Ka Myntri jong ka Tnad ka Koit ka Khiah I Dr Ampareen Lyngdoh mynta ka sngi Balang,I la ong ba ka jingdon jong ki nos ha Jylla ka long kaba pahuh bha haba pynpaw ba ki don bun shah ki nos ban ïa ka kam ba lait ha Jylla.
“Namar kane, ka Tnad mynta ka sngew ba donkam ban wad ïa ki lad ki lynti ïa kine ki nos shano ban pynïoh kam lane kumno ban leh na ka bynta ka jingim jong ki. Kumta, ka Sorkar kan sa ïakren bad ki Institution kiba ïatreilang bad ki Agency bapher bapher kiba lah ban ïarap ïa ngi ban aikam ïa kine ki nos” ong I Dr Ampareen haba ïakren bad ki nongthoh khubor.
I la ban jur ruh halor ka jingdonkam ban pynthikna ba ki nos kin hap ban ïoh ïa ka kabu lane ai jinghikai ïa ki ban kren ïa ki ktien thylliej bapher bapher.
“Kum ka nuksa, ngi tip ba ki don bun ki ri ka pyrthei kiba donkam ïa ka jingshakri ki nos ki bym don satia ha kitei ki ri hynrei lada ki nos jong ngi ki long kiba don ka akor ka burom, lada ki lah ban ïoh ïa ka sap ban kren ïa ki jait ktien bapher bapher ban kren ïa ki Ktien jong ki Ri ka dewbah Europe, lehse ki lah ban kren French, Japanese, namar la ïathuh ïa nga dang shen ba ka don ka jingdawa ïa ka jingshakri ki nos ha kine ki ri nongwei. Namar kata, ngi hap ban khmih ïa kane ka jingbym ïohkam ïohjam wat ha kane ka kam ruh” ila ong.
I Dr Ampareen ila ong ba ka Jylla kam don satia ïa ki santion post kaba kot kumba 1500 tam bad bynrap ba “Ngi la phaikhmat ïa ka sienjam kaba lah ban shim ha kaban pynthikna ba ka sanction post kaban long kat kum ki kyndon hapoh ka Ri ba kan don hangne”.
Ila ong “Man ka por haba phi hap ban plie ïa ki PHC lane CHC kiba la dep ban tei hynrei haba phi ïatyngkhuh bad kane ka jingeh ba kam don ka santion post. Namar kata, ngi hap ban buh ha ka jingmut jingpyrkhat jong ngi ïa kane ka bynta namar katba ngi dang jam sha kine ki san snem ban wan, ngi hap ban phaikhmat sha ka song pisa ban kyntiew ïa ki jaka ai jingsumar khamtam hadien ka jinglynshop ka khlam Covid. Ngi donkam mynta ban pynthikna ba shisien ba kine ki jingtei ki ladon, ki dei ban don ïa ki Nongtrei kat kum ka jingdonkam”.
Ha kajuh ka por, ka Myntri ka Koit ka Khiah I pyntip ba ki dang don shibun bah ki kam Doktor Specialist kiba hap ban pyndap hapoh ka Jylla. “Nga tharai ngi kot ïa ka 177 bad ka National Standard ka long 300 tam” ila ong.
I pyntip ruh ba ki don sa kumba 50-60 ngut ki doktor kiba la leit ban pule ïa ka laiñ specialist.
