Ka Sorkar ka pynleit jingmut tang halor ka jingdawa pynkylla ïa ka Roster System: Prestone

0

Shillong, Ïaïong 25: U Symbud Myntri Rangbah ka jylla u Bah Prestone Tynsong ha ka sngi Ba-ar u la kam ba ka sorkar kumba long pynta ka pynleit jingmut ha kaba ïadei bad ka jingdawa pynkylla halor ka jingpyntreikam ïa ka Roster system ha ka thungkam thungjam ha ki tand bapher bapher kat kum ka Reservation Policy.
“Ka dei ka kamram ka sorkar ban pule bniah biang ïa kane ka mat bad na ka liang jong ngi kum ka sorkar ngi dang leh ïa kane,” ong u Bah Prestone haba kren sha ki lad pathai khubor.
U Bah Prestone u la ïathuh ruh ba na ka liang ka sorkar kan sa lum ïa ka All Party Meeting ha une u bnai ban wan na bynta ban ïatai sani ïa kane ka kam, ‘hynrei shuwa ban poi shata ngin sa ïatai sani shuwa ma ngi hapoh ka Kynhun Myntri bad hadien kata sa bad ki paralok kiba don lang ha ka MDA,’ la ong u Bah Prestone.
Haba kylli halor ka jingdawa ban pynkylla ïa ka Reservation Policy u Bah Prestone u la ong, “Ka jingpynkylla ne amendment kam ieng satia namar kane kam dei ka aiñ (act) hynrei ka dei tang ka polisi kaba la sdang pyntreikam naduh u 1972”.
“Nga ïohi ba ka don ka seng saiñ pyrthei kaba dawa ban khot dorbar kyrpang, ha ka jingshisha kane kam donkam satia na bynta ka polisi, namar ban khot dorbar kyrpang ka donkam tang haba ka sorkar ka thmu ban pynkylla ïa ki aiñ (act) ym ki polisi,” u la bynrap.
U la ong ruh ba ka jingdawa pynkylla ïa kane ka polisi kam dei ka kam kaba suk kumba ki pyrkhat.
“Ban pynkylla ïa ka Reservation Policy ka dei ka kam kaba jwat haduh katta katta bad lada ha kaba ïadei bad ka Roster, Hooid kum ka sorkar ngi pule sani ïa kane ka jingdawa bad ynda la pura ka por ngin khot ïatai ïa ki seng saiñ pyrthei bad ki nongïalam ki jaidbynriew ban ïatai ïa ka jingtreikam jong ka lada pyntreikam sha khmat naduh ba la mynjur ne lada pyntreikam naduh u 1972,” u la ong.
U la ong ruh ba kumba long mynta ka jingdawa pynkylla ïa ka Roster System ka dei beit halor ka nongrim ba dei ban pyntreikam naduh ba la mynjur ïa ka sha khmat ym ban phai dien sha u 1972.
Haba ïadei bad ka jingdawa ka VPP halor ka Roster u Bah Prestone u la ong “Phi tip ba ki (VPP) dawa ba dei ban pynsahngeh ïa ka jingpyntreikam ïa ka Roster System bad ka thong jong ki ka dei ban pynkylla ïa ka Reservation Policy hynrei namar na ka liang jong ngi ngi dang pynleit jingmut ïa ka Roster ngam kwah ong eiei ïa kane”.

Leave A Reply

Your email address will not be published.