Dang bun ki jingduna hapoh ka CHC Mawkyrwat, pynsngew ka KSU ha ka Myntri ka Koit ka Khiah

Shillong, ïaïong, 26: Ka Khasi Students Union (KSU) South West Khasi Hills District Unit ha ka Sngi Balang ka la pynsngew hakhmat ha Myntri jong ka tnat ka Koit ka Khiah ka Dr. Mazel Ampareen Lyngdoh halor ki jingduna hapoh ka Hospital 100 jingthiah jong ka Mawkyrwat ïa kaba la plie paidbah ha u bnai Nohprah, 2022.
Ha ka jingïakren bad ki lad pathai khubor u President jong ka Seng u Bah Forwardman Nongrem u la ong, “hapoh ka Radiology ka Hospital ka dang donkam shuh shuh ïa ki nongtrei bad ka X-Ray bad kumjuh ruh ban wanrah ïa ki mashin. Kane ka Hospital ka dang donkam ruh ïa ki Surgeons, ki tiar ki tar hapoh ka Intensive Care Unit (ICU) namar kumba long mynta ym pat don eiei.”
Ka Seng ka la dawa ba dei ban thung noh mardor ïa u Medical Supritendent bapura khnang ba kan ym don ka jingsuki ha ka jingtreikam jong ka Hospital.
“Ngi la kyrpad ruh ba dei ban thung la kumno kumno sa kumba 4 tylli ki posts ha ka Grade IV, ban thung shuh shuh ïa ki nongtrei hapoh ka Outpatient Department (OPD), ban pynbun shuh shuh ïa ki Staff Nurses namar kumba long mynta ka Ratio long 1:30, ban thung shuh shuh ïa ki Assistant ha ki liang bapher bapher kum ha ka Pharmacy, Head Nurse bad kiwei kiwei. Ngi la kyntu ruh ban dei ban thung shuh shuh ha ka post Driver namar mynta kane ka Hospital ka dang don tang uwei, ban thung shuh shuh ïa ki nongap pahara ha ka khyrdop bad ha ka phyllaw jong ka Hospital,”u la ong.
Nalor kata, ka seng ka la dawa ba kane ka Hospital ka donkam ïa ka Ambulance namarba ki kali EMRI 108 kiba dang duna katba kum ka jingdon jong ki nongpang.
“Ka long kaei kaei kaba sngewsih ba kane ka Hospital kam pat don ki tiar hapoh Operation Theater Department kaba la i donkam ban buh bad wanrah noh kham kyrkieh ïa ki tiar ki tar bad ym tang katta, ha kane ka Hospital kam pat don ïa ki Generator, ka kamra jong ka Nursing Superintendent, ka umbam umdih bad ban pynbiang ruh ïa ki jingbam kiba tei na bynta ki nongpang,” u la bynrap.
Shuh shuh u la ïathuh ba ka seng ka la dawa ïa ka tnat ka Koit ka Khiah ban mang pisa na ka bynta ban shna noh ïa ka ophis District Medical and Health Officer (DM&HO).
“Ka long kaei kaba sngewsih wat hadien 10 snem tam ba ka South West Khasi Hills District ka la ïoh ïa ka distrik bapura hynrei kam pat don pat ïa ka building jong ka Ophis District Medical and Health Officer. Kumba long mynta, la pyndonkam kum ka ophis DM&HO ïa ka jaka sah jong ki Doctor bad ki nongtrei ka 100 Bedded CHC,” la ong u Bah Nongrem.
Ha kane ka jingïakynduh ïa ka Myntri ka Koit ka Khiah ka seng ka la pynsngew ruh ha kaba ïadei bad ki jingdonkam hapoh ka Wahkaji PHC, kata naduh ka jingbym biang jong ki dawai dashin, ban thung sa uwei u doktor, ban pynbiang shuh shuh ïa ki nongtrei kum u Pharmacist bad kwei kiwei, ban pynïoh sa kawei ka kali Ambulance.
Nalor kata ka seng ka la pynsngew ba la donkam ban pyntreikam noh ïa ki Health Sub Centre ba la dep shna, kawei ha ka shnong Mawthong bad kawei pat ha ka shnong Mawkhyrwang hynrei ki bym pat lah ban treikam haduh mynta.
Une u nongïalam ka KSU u la ïathuh ruh ha ka jingleit jurip dang shen jong ka seng ïa ka Mawsynram CHC ka seng ka la lap bun ki jingduna naduh ka um, ka jingmaramot ïa ka hospital bad kumjuh ruh kane ka hospital ka donkam ïa ka Ultrasound bad X-ray bad sa kawei ka Ambulance.
Ka seng ka la pynsngew ruh ba la donkam ban buh sa kawei ka Health Sub Centre ha ka shnong Mawhiang, namar kumba ka long mynta ka thain Sawsymper kaba hap hapoh ka Mawsynram C&RD Block, East Khasi Hills District ka kynthup ïa ki 16 tylli ki shnong hynrei kane ka thain pat ka dang don tang kawei ka Health Sub Centre.
Nalor kane, ka seng ka la dawa ban buh noh da ka Health Sub Centre ha ka shnong Jyllep namarba ka la don ruh ka jingïasoi sohkular hapdeng ka Sorkar bad ki trai jaka hynrei kaba sah mynta ka long sa tang ka jingmang tyngka na ka sorkar ban shna ïa ka building.
Ka seng ka la dawa ruh ba dei ban kyntiew kyrdan noh ïa ka Dangar PHC sha ka CHC kaba ai jingshakri ïa ki paidbah kiba sah ha ki shnong khappud bad ka ri Bangladesh bad ka dei ruh ka PHC kaba don kham pajih na ki CHC bajan namarba ka jngai kumba 15-20 kilomitar na ki CHC kum ka Mawsynram CHC, East Khasi Hills District bad ka Ranikor CHC ba don ha South West Khasi Hills District.
“Kane ka jingjngai na kiwei ki CHC nalor ba ka don kham sha kyndong ka la buh jingeh ïa ki paidbah ba leit wad jingsumar bad don ruh ki khep ba la don ki jingjia ba sngewsih. Kumta, ka seng ka sngewdei ban kyntu ïa ki bor sorkar ba ki dei ban kyntiew kyrdan noh ïa kane ka PHC sha ka kyrdan CHC khnang ba kan lah ban ai ka jingshakri ba kham bha ïa ki paitbah napoh ka dong ka thaiñ hi baroh kawei nangne shakhmat.