ïa ki paidbah ki khang leit NPP, ïalade pat lem bad 11 ngut ki MLA ki wan sdien bad ka NPP

Shillong, Ïaiong 26 : U kyrtong ka NPP na Sohiong ban aireng ha kane ka elekshon MLA kaban sa long ha ka 10tarik Jymmang, Bah Samlin Malngiang ha ka sngi Balang u la kynnoh ba ka UDP ka khang ïa ki paidbah ban leit kyrshan ïa ka NPP hynrei baroh ki MLA jong ka pat ki wan ban sdieng lang ha ka sorkar ba ïalam da ka NPP.
Haba kren ha ka jingialang ïalap elekshon kaba long ha Madanbitaw, u Bah Samlin u la ong, “Ka Seng UDP ka la kob la sarong bad kynthoh bad ong ïa phi ki paid Sohiong ba ym long da lei lei ban jied ïa ka NPP namar ki ong ba ka NPP ka bym long. Hynrei ïalade, ki 11 ngut ki MLA hangtei ki sdien rdin bad ka NPP, ki ong long.”
Nalorkata, u ong ruh ba ki paidbah ki dei ban tip ba lada leit ma ki long hynrei lada leit pat u paidbah ym long. U ong ruh ba ki paidbah mynta kim dei shuh ban phah agent da kino kino hynrei ki dei ban leit hi.
Shuh shuh u ong ruh ba ka NPP ka don ïa ki nongïalam kiba shitrhem haman la ki polling station kiba la trei borbah na ka bynta kane ka elekshon bad dei na kata ka daw ba ki sngewskhem ban jop donburom ha kane ka elekshon mynta ka kynti.
Lah ban kdew hangne ba na ki 11 ngut ki MLA jong ka UDP kaba treilang ha katei ka sorkar synrop, arngut ki ïoh ban bat ia ka shuki Myntri Sorkar.
Ha kane ka sngi, la ïoh ruh ia ka jingkren naki nongïalam kiba wan na kiwei ki party kynthup ïa u Bah L Sun, Bah CB Ryntathiang, Bah Phrang Kharpan, Bah Kitborlang Nongrem ba dei State President ka NPYF, nangta Kong B Warjri, kumjuh ruh na u Bah Sherbor Mawlong MDC nalor kiwei kiwei.