Sangeh ka kren kopia, na ka 26 ngut ngin kiew sha ka 32 ne 33 ngut, kob u Bah Prestone ha Sohiong

Shillong, Ïaiong 26 : U National Vice President ka NPP, Bah Prestone Tynsong ba dei ruh u Symbud Rangbah ka jylla ha ka sngi Balang u la ong ba kiwei ki party kim dei satia ban kren kopia namar ka party mynta na ka 26ngut ba ki don ka lah ban kiew wat sha ka 32 ne 33 ngut ruh.
Haba kren ha ka jingïalang ïalap elekshon na bynta u kyrtong ka NPP ha Sohiong, Bah Samlin Malngiang, na ka liang u Bah Prestone u la ong ruh, “Ka khubor kaba shai kdar ïa kito ki briew kiba kopia, sngewbha pynduna noh ka jingkren kop namar kam don jingmut.”
Shuh shuh u ong ruh ba ha u 2018 ki jop tang 19 ngut hynrei thik thik ki pynïaid ïa ka sorkar haduh ban da kut u 2023. “Mynta 26 ngut ngi don bad ngi lah ban poi sha ka 32 bad 33 ngut. Na ka daw nga sngew ban ong ba kiwei ki paralok kyrtong jong kiwei pat ba to beiñ katba beiñ hynrei phin ym lah ban pynkhih ïa u thiedbah jong ka NPP,” u la bynrap shuh shuh.
U Bah Prestone u la ong ruh ba ha ki san snem ba la dep ma u bad u Conrad ki la shah kynnoh shah kynthoh laiphew jait ryngkat ka jingdro dur dro dar kaba ym ithuh ithaw shuh hynrei ki ïai neh pat ban trei na ka bynta ban shakri ïa ka jylla haduh ban da kut ka samoi.
Ha kane ka sngi, utei u nongïalam ka NPP u kubur ruh ba ka jingkylla ka la tikna beit ba kan urlong ha shwa ka 8tarik u Jymmang. Watla um shym la kren shai hynrei la sngewthuh beit ba katei ka jingkren jong u ka thew beit sha ki arngut ki MLA ka PDF kiba pynkhreh ban wan pyniasoh noh mynta sha ka NPP.
Nalorkata, haba kren pat hadien ba la wai ka jingïalang, u Bah Prestone u la ong ruh ba ka lynti ka don ïa kiwei pat ki party ba kin wan pynïasoh noh sha ka party ban pynkhlaiñ ïa ka sorkar MDA.