Mawkyrwat, Ïaïong 27 : Ka lympung ïalehkai Mawlangwir Football Community Shield 2022-23 ba la pynïaid da ka Mawlangwir Sports Club mynta ka kynti ka la poi sha ka phainal ha ka ba ka Se-Lajong Football Club kan ïa aireng pyrshah ïa ka Nongbri Brothers Football Club ban ïa knieh ïa ka nam nongjop jong ka lympung.
Kane ka jingïalehkai phainal kan long ha ka 28 tarik u Ïaïong, 2023, Sngi Thohdieng, ha ka por 1 baje nohphai sngi ha Madan Saitsnad, Mawlangwir, South West Khasi Hills District.
Kum ban shu pynkynmaw, ka Se-Lajong FC ka la jop pyrshah ïa ka Lamare SC ha ka semi-final katba ka Nongbri Brothers FC ka la pynrem ïa ka Azriel SC ban ïoh rung sha ka final. Kine ki kynhun ki la pyni ïa ka rukom ïalehkai ka ba itynnad bha ka baroh kawei ka lympung.
Kumta ka Mawlangwir Sports Club ka khot ka wer ïa ki paid riewieid phutbol jong dong ka thai baroh kawei ban wan shakhi da la de ïa kane ka jingïalehkai ba itynnad bad kaba khadduh jong ka lympung bad ban wan ai ka jingkyrshan ïa ki kynhun ki ban ïa aireng.
U kongsan ha kane ka sngi ban pynkut un long u bah Renikton Lyngdoh Tongkhar, MLA ka Mawkyrwat Constituency bad u Symbud Kongsan un long u bah Carness Sohshang, MDC ka Mawkyrwat Constituency.
Ka dor jong ka bai rung sha kane ka jingïalehkai ka long 50 tyngka shi khlieh.
