Mawkyrwat, Ïaïong 27 : Ka Kyntiew-La-Ki-Jong Football Club ka la long ka lahduh hadien ba ka la lah ban pynliem noh ïa ka Mawkyrwat Sports Club da 2 – 1 kol ha ka IV Invitation Football Tournament 2023 ba la pynlong da ka Sohkhyllam Sports Club hapoh madan Sohpian, Sohkhyllam, South West Khasi Hills District.
Ha kane ka lympung ïalehkai kynjatbol la wan ïashimbynta da ki 16 tylli ki kynhun na kylleng ki jaka jong ka thaiñ Mawkyrwat South West Khasi Hills District.
Ha ka phai sha ka jingïalehkai naduh ka kyllastep ka Kyntiew-La-Ki-Jong Football Club ka la ïalehkai bha ha kaba ka la ïoh ban thjep ïa ar tylli ki kol kiba ha ka minit ba 10 da ka Free-kick kaba itynnad na u Nickelson Bina bad hadien kata ha ka minit ba 14 la ïoh thep ïa ka kol kaba ar kaba itynnad bha da u Teibor Ryntathiang.
Ha kaba wan ka kyllamiet ka Mawkyrwat Sports Club ka lah ban ïalehkai bha hynrei ki nongap bak jong ka Kyntiew-La-Ki-Jong FC kim ju ailad ban thep ïa ka bol sha kol phewse ha shwa ban kut ka la ïoh hi ban pynphai ïa ka shi kol tangba ka por ka la dier eh ka por ka la kut bad ha ka jingïalehkai la tam hi da ka Kyntiew-La-Ki-Jong FC bad rah syndon ïa ka lam lahduh.
Ha kane ka sngi la wan pynkut bad pynhap pyrda da u Babu Bording Lyngdoh uba long u kongsan ha ka jingïadon ryngkat kiwei pat ki Rangbah kata u Myntri ka Shnong Sohkhyllam u bah P. Wanniang kum u symbud kongsan, u B.S. Marbaniang, u Babu Synshar Lyngdoh, u Bah K. Wanniang, ki dkhot bad Nongkitkam jong ka sports club lem bad ki paidbah ieit phutbol jong ka dong ka thaiñ kiba la pyndap ïa ka madan.
U Babu Bording Lyngdoh uba long u kongsan ha ka jingkren ba lyngkot u la ai jingïaroh ïa ka Sohkhyllam Sports Club kaba la bteng na ka por sha ka por ban pynlong ïa kum kine ki jait jingïalehkai ban pynkiew ïa ki ‘rangïalehkai hapoh ka dong ka thaiñ namar la wan ïashimbynta da bun ki ‘rangïalehkai kiba dei na kylleng ka ri lum Khasi bad Jaiñtia.
Ha kajuh ka por u la ai khublei shibun ruh ïa ki nongïalam jong ar tylli ki kynhun kiba la poi sha ka thong bad ka wat ba khadduh ha kaba ki la pyni shisha ïa kata ka sap bad ka jinglah jong ki ban pashad ïa ka bol. Namarkata, u la kyntu ruh ïa ki ‘rangïalehkai ba kin kiar na ki jingbam jingdih ba sniew ba pyntroiñ ïa ka met ka phad namar lada ki ngop ha kine ka lawei jong ki kan long kaba dum.
La ïoh ban sam ïa ki khusnam sha ki baroh ar tylli ki kynhun kiba la poi sha ka wat ba khadduh ha kaba kaba jop ka la rah ïa ka khusnam ryngkat ka song pisa kaba T. 30 hajar bad kaba shah rem noh ka ïoh rah T. 16 hajar bad la ïoh ban sam ruh ïa ki khusnam shimety sha ki ‘rangïalehkai kata ka man ‘rangïalehkai ba kynsai la ioh rah da u Teibor Ryntathiang, nam nongthep bun kol sha u Nickelson Bina, nam nonïalehkai bat bit sha u Donlad Diengdoh na ka Kyntiew-La-Ki-Jong FC bad u nam nongap-kol ba tbit sha u Gavin Wanniang jong ka Mawkyrwat SC.
