5th MEGHALAYA GAMES 2024 : Paw ba kham tbit ki Rang & Thei ka Ri Bhoi ha ka Phutbol hadien ba khur takma ksiar

Tura, Kyllalyngkot 20: Kan dei ka janmiet jong ka jingkmen ka bym lah shu ban batai ïa ka kynhun ki nongïalehkai ba mihkhmat ïa ka Ri-Bhoi Distrcit, hadien ba ki rang ryngkat bad ki thei ki la lah ban nym ailad satia ïa kiwei pat ki District ban khur ïa ka takma ksiar ha ka phutbol, naba baroh ar kynhun shynrang bad kynthei ki la khur hi ha baroh ar thup ïa ka kyrdan ba nyngkong jong kane ka jingïalehkai ïa kiba 18 snem ka rta kynthei bad shynrang.
Ha lyndet ka jinglah ban ïoh rah ka kynhun napoh Ri-Bhoi District lah ban ong ba ka dei namar ka jingshim khïa bad kitkhlieh lang da baroh katta naduh ki khynnah, ki kmie ki kpa, nangta sa ki skul ba ki khynnah ba ki leit ban pule, ki dkhot Ri Bhoi District Sports Assocïation kaba juh trei borbah ban sain dur ne ban pynmih ïa ki khynnah ïalehkai kiba kynsai.
Ha ka jingïakhun ïa ka phainal kiba la long hynnin ka janmiet jong ka sngi Thohdieng jong ka taiew ha P.A Sangma Stadium, Tura, na ka lïang jong ki kynthei, ka Ri-Bhoi ka la lah ba kan pynliem noh ïa ka East Khasi Hills lyngba ka tie breaker da 3-2, katba ïa ka takma rnong ne kyrdan kaba lai na kane ka jingïakob ka leit sha ka kynhun ki thei ïalehkai jong ka Eastern West Khasi Hills District hadien ba ki la lah ban pynliem noh lyngba ka tie breaker ïa ka South West Khasi Hills District.
Haba phai pat sha ka jingïakhun jong ki samla shynrang, ka kynhun ïalehkai jong ka Ri-Bhoi District ki la lah ban pynliem noh ïa ka West Jaintïa Hills District da 1-0 bad ïa kane ka shi kol ba kordor tam ïa ka Ri Bhoi la the pïa ka da u Riskhem Syiem.
Ka East Khasi Hills District mynta ka kynti ka la hun ba kan bat ïa ka kyrdan kaba lai ne khur da ka takma rnong kaba la wan hadien ba ka la lah ba kan pynliem noh ïa ka West Garo Hills da 3-1.
Ha kaba kut jong ka jingïakhun baroh u Freddy Jyrwa ka East Khasi Hills uba la ïoh ban thep 4 kol, u la ïoh ban rah ïa ka nam Top Scorer, katba na ka lïang u Kitboklang Buam ka West Jaintïa u la ïoh ban rah ïa ka nam best goalkeeper, katba u Tiros Kyndait jong ka West Jaintïa Hills u la ïoh ban rah ïa ka nam Best Player.
Haba phai sha ka lïang ki kynthei, ka nam thei ap kol kaba kynsai ne best goalkeeper ka leit sha ka Nibari Maring jong ka Ri-Bhoi, kaba la mih paw na ka daw ka jinglah ka jong ka ba kan kyrda (save) ïa ki artylli ki penalty ha ka por ba la shut ïa ka tie breaker, katba ka Inrilaidor Khongthaw jong ka East Khasi Hills ka la ïoh ba kan khur haduh artylli ki khusnam kaba kynthup ïa ka nam top scorer hadien ba ka la lah ba kan thep haduh 15 tylli ki kol bad kumjuh ïa ka nam player of the tournament.