Shillong, Kyllalyngkot 20: Ka kynhun ïalehkai XI Star ryngkat bad ka Sanmer CC ki la ïoh ban khur jingjop ha ki jingïakhun jong ka lympung Shillong Cricket League 3rd division ba la long hynnin ka Sngi Thohdieng ha madan Urkaliar.
La ïoh ban sdang ïa ka jingïalehkai kaba nyngkong hapdeng ka XI Star pyrshah ïa ka Laimer CC. ïa ka toss la jop da ka XI Star kaba la jied ban tied nyngkong.
Ki rangïalehkai jong ka XI Star ki la lah ban tied pyndep baroh ïa ka 20 over bad kynjoh sha ka 166 ron shah pynhap 7 wicket. U Sunil Kumar u la tied 59 ron naki 24 bol katba u Ariyan Shrestha u la lah ban ïarap da kaba kamai 30 ron naki 35 bol.
Napdeng ki rangkawangbol kiba kham seisoh na ka kynhun liang pyrshah ki long u Donbor marbaniang (4 over: shah tied 14 ron: khur 3 wicket) bad u Bansynshar nongsiej (1 over: shah tied 8 ron: khur 2 wicket).
Haba pyrshang ban beh ïa ka thong ba la buh da ka XI Star, ka Laimer CC ka la shah pynkut noh hadien 13.4 over namar ka jingtbit ki rangkawangbol ka liang pyrshah. Ka Laimer ka la ïohlad ban kynjoh tang sha ka 90 ron shuwa ba baroh 10 ngut kin shah pynhap.
Tang u Kitdor (25 ron naki 21 bol) bad u Boxer Marbaniang (18 ron naki 17 bol) kiba la lah ban kyntiew ïa ka ron na bynta ka kynhun hynrei kane kam shym la lah ïarap ban lait na ka namrem, ha kaba ka XI Star ka la khur ïa ka jingjop da 66 ron.
Napdeng ki rangkawangbol ka liang pyrshah kiba la ïoh ban pynhap bun wicket ki kynthup ïa u David Isaacson u ba la kawang 2.4 over, shah tied 13 ron bad pynhap 3 wicket, bad u Rahul Balmiki u ba la kawang 3 over, shah tied 16 ron khur 2 wicket.
ïa ka nam Player off the match la khur da u Sunil Kumar Yadav u ba la tied 58 ron ryngkat bad 2 wicket kiba u la ïoh pynhap.
Haba phai pat sha ka jingïakhun kaba ar hapdeng ka Sanmer pyrshah ïa ka Metalicca Rising Star. Ka Sanmer CC ka la jied ban tied nyngkong hadien ba jop ïa ka toss.
Ka kynhun ka la ïoh ban buh ïa ka thong da 171 ron shuwa ban shah pynhap baroh 10 ngut ki wicket. Na ka liang jong u Gilbert kharmujai u la lah ban tied haduh 58 ron naki 29 bol, katba u Banshan Dakhar u la kamai 29 ron naki 24 bol.
Haba phai sha ki rangkawangbol ka liang pyrshah, u Gurjit Singh u la kawang 3 over, shah tied 18 ron bad khur 2 wicket, nangta u Nabindu das u la kawang 4 over, shah tied 15 ron bad khur 3 wicket.
Na ka liang jong ka Metalicca Rising Star ka la ïakhun tyngeh ban kynjoh sha katei ka thong ba la buh hynrei kam shym la lah satia namar ka jinglap ba kut ka 20 over ba la buh katba ka ron ba kamai ka dang duna ïa ka thong, kata da 161 ron, hap 9 wicket.
U Pradeep purkayastha u la kamai 36 ron naki 22 bol hynrei kane kam shym la biang ïa ka kynhun ban lait na ka namrem.
Ki rangkawangbol ka liang pyrshah kiba la lah ban ïalehkai bha ki long u Gilbert kharmujai (4 over: shah tied 29 ron; Khur 2 wicket) bad u Jhon dkhar (4 over: shah tied 18 ron: khur 1 wicket) kaba la ïarap ïa ka Sanmer ban khur jingjop da 10 ron ha kane ka jingïakhun. ïa ka namtam lane ka Player off the match ka la leit sha u Gilbert kharmujai, nalor ba u la khyrwit 58 ron ha ka tied u la lah ruh ban khur 2 wicket ha ka bol.
