500 klur tam nga la wanrah ha Jirang Constituency, hynrei dang bun ki nongkynthoh: Sosthenes Sohtun
Nongpoh, Rymphang 16: Da ki hajar ngut ki paidbah kila tuid mynta ka sngi sha ka thain Patharkhmah haka jingïalang jong ka party NPP ban ïalap elekshon naka bynta ban pan ka jingkyrshan ïa u Bah Sosthenes Sohtun kum u kyrtong ka NPP na Jirang Constituency.
Ha katei ka sngi la wan ruh ban sakhi da ka jingdonlang u Bah Prestone Tynsong, Vice President ka NPP, Bah Sniawbhalang Dhar, Bah Sosthenes Sohtun, Bah Victor Rani MDC ka Jirang, ki nongïalam ka NPP na ka jylla bad Ri Bhoi District bad kiwei kiwei ki riew rangbah bad ki nongkitkam ka party.
Haba kren ha katei ka sngi naka liang u Bah Sosthenes Sohtun kum u kyrtong ka NPP ha Jirang u la pynpaw ka jingsngewkmen kaba ki paidbah ka thain Jirang kila pynpaw ka jingshaniah ha u kum u MLA ha kine ki 5 snem bad dei lyngba ka sorkar MDA hapoh ka jingïalam ka NPP la lah ban wanrah shibun ki kam pynroi haka thain Jirang Constituency bad kumba long haduh mynta palat 500 klur ki skhim la pyntreikam ha katei ka thain ba kynthup ïaki project bapher bapher.
U la ong ruh ba ha kine ki 5 snem u la pyrshang ban trei shibun ki kam khamtam ban wanrah ki kam pynroi, hynrei kaba sngewsih ba dang bun ki nongkynthoh kiba pynthohbria ïa u kum u MLA, da kaba pynmih daw da kumne kumtai, hynrei haba nujor bad ki phew snem bala leit noh ka jingwanrah ïaka roi ka par ka ïaryngkat bad kine ki 5 snem ba mynta.
U la ong ruh ba kum u nongmihkhmat ba ki paidbah kila pynjop donburom ha u 2018, u dang don shibun ka thong bad ka jingangnud ban pyntreikam ha Jirang Constituency, bad buh ka jingkyrpad ïaki paidbah ba kin ai biang ka jingkyrshan ha kane ka kynti ba mynta naka bynta ki kam pynroi.
Naka liang u Bah Sniawbhalang bad u Bah Prestone Tynsong haba kren ha katei ka sngi kila pynpaw ba kum u MLA ka Jirang ki paidbah kin nym ioh shuh bad ka dei ka jingkyrkhu kaba khraw ba ki paidbah kila pynjop donburom ha u 2018 ha kaba la iohi shisha ka jingkylla ha ka thain Jirang naduh ki surok, ki jaka pule, ki jaka sumar bad kiwei kiwei ki kam pynroi.